SAMARTYA sentong nung Katipenla-i sempet angu

Mokokchung, February 11 (TYO) : Collective action for Basic Rights Foundation(CBRF)-i Social Work Department of St. Joseph’s College(Autonomous) Bangalore den lokteper February 5 aser 6 anogotem nung ayonga akaba SAMARTYA sentong nung Khensa yim nungi Kongru, Katipenla-i ‘Persons with Disabilities’ (PWDs) kübok sobaliba tsütsü mapa tajung inyaktetba atema sempet ka nguogo, ta sangdong ka ajanga metetdaktsü.

La ya tang Care & Support Society, Mokokchung nung züngsem tajung ka lir.

SAMARTYA ya Bangalore nung küm shia akaba sentong ka lir aser iba ya mata mabensartemi pei dak aliba sempet sayuba aser People With Disabilities (PWDs) temi inyaktetbatem tushiba sentong ka lir. Linük nung mata mabensartem indang tebilemtsütem meteta kümdaktsütsü asoshi India nung yimtsüngtem dak rangloker iba sentong ya akar, ta kasa sangdong ajanga ashi.

State 17 aser Union Territory ka nungi mata mabensar 52,000 rongnungi Katipenla-a iba sempet angur rongnung ka liasü.