Samoura 1 buba tetsür FIFA Secretary General akümer

Mexico City, May 14 (Agencies): Alima ajunga nung football ketdang asür, FIFA-i otsüsütsüsa tan mezüngsüa tetsür Secretary General yashi, Hokolbar nü shimogo.
Tashishitsü ken o jenti ajurubaren agientsü nükjidong nung FIFA-i par Secretary General inyaktsü asoshi Senegal’er United Nations (UN) ketdangser, arishi küm 54 tain Fatma Samba Diouf Samoura shimba osang jangjaogo.
Tang Nigeria nung tentetba UN Development Program nung inyakla, Samoura-i UN nung küm 21 tashi teinyakdak lir saka lai football asayatsüren nungbo shilem magi aruba osang jangjaogo.
“Tebur aser tetsür naprong nem sako maongka agütsütsü aser taoba mapang football asayabaren nung shilem magir ka shimba ajanga FIFA tajungba küma melenshidaktsütsü nükjidong nung Samoura FIFA Secretary General shimogo,” ta Mexico kübok Mexico City nung amenba FIFA Annual Congress nung FIFA Tir, Gianni Infantino-i sangoktsü.
“Samoura-i lokti lenitsü aser lokti jenjang tajungba kümdaktsütsü ajangshia lir aser lai FIFA lenisütsü menden abenba ajanga FIFA jenjanga tajungba akümtsü imlar,” ta pai shisem.
“Tanü ya ni asoshi tongtipang anogo ka lir. FIFA Secretary General menden abentsü asoshi kü nem maongka tulu agütsüba atema kanga pelar,” ta Samoura-ia metetdaktsü.
“Ni lokti lenisütsü ajangshibatem amshia FIFA nung temelenshi tajung bener arutsütsü merangtsü,” ta lai nangzük.
FIFA-i tentetba reprangshitsü luden kati lenisütsü menden abentsü tetendangba sentong ka agiba sülen Samoura-i taküm June ita tum nungi tenzüka FIFA lenisütsü mendenji abentsü.
Samoura-i taoba Secretary General, Jerome Valcke melenzüka FIFA Secretary General tasenba akümtsü maongka angur lir.
World Cup asayamong ticket ayokba aser World Cup asaya television nung sayutsü den sendakba maparen nung ozüng alema inyakba ken o nung aitsüba sülen France nunger Vlacke taküm January ita lenisütsü menden nungi anentsüba den külemi, pa nem taruba küm 12 tashi football asayatsü aser lenisütsüren nung shilem magitsü temerenshi agüja lir.
Vlacke melenzüker shimba jakdang Germany nunger Markus Kattner-i FIFA Secretary General mendenji bena liasü.
Ano külen, tan amenba FIFA Congress-i par tentet nung Kosovo aser Gibraltar na züngsem ama anioksema, FIFA nung züngsemba linük ajak agi 211 akümba osang jangjaogo.