Sample 25 tendangba nungi 22 negative putet; 3 indang osang mangu

Dimapur, March 31 (TYO): Nagaland Minister aser Covid-19 atema State Spokesperson, Neiba Kronu-i March 31, 2020 nü Nagaland nung Covid-19 indang osang tesüsabuba metetdaktsüogo.
Tanü pai ashiba agi, “tang tashi nung Nagaland nung sample 25 tendangtsü atema bener yokba nungi sample 22 ‘negative’ ta putetogo aser sample 3 indang osang ano mangu lir.”
March 6, 2020 sülen tangalen nungi arur nisung 4704-i pei pei District Surveillance Team nem osang sangoktsüogo aser parnok 876 quarantine mapang tembangogo, ta Minister Kronu-isa ashi.
Nagaland atema Personal Protective Equipment (PPE) Kits, hand gloves, hand sanitizer, N95 mask, portable ventilator, ICU ventilator, full face mask aser tanga osettem tanabuba shilem Delhi nungi Guwahati-i yokogo aser itemji asüng Nagaland-i bener arutsü. Maneni, Sodium Hypo Chloride litre 5000, Gloves aser Sanitizers Guwahati tongogo, ta paisa shisem.
“ncovid-19 Nagaland App nung nisung 3905-i pei sasa register süogo saka nisung 1165-i osang tejangja magütsü lir. Anungji, March 6, 2020 sülen tangalen nungi aruba nisung ajaki iba App nung osang tejangja agütsütsü mepishir” ta Minister Kronu-isa metetdaktsü.