Sample 32 nungi 7 indang osang mangu lir: Minister Kronu

Dimapur, April 1 (TYO): Tanü nikongtsütsü 3:00 ako tashi nung Nagaland nungi COVID-19 atema sample 32 tendangtsü bener yokogo aser iba nungi 25 ‘negative’ ta putetba osang aruogo aser sample 7 indang osang ano mangu lir.

March 6, 2020 sülen tangalen nungi arur nisung 4747-i pei pei District Surveillance Team nem osang sangoktsü home quarantine asü aser parnok 1146 tashi quarantine mapang temogo, ta COVID-19 atema State Spokesperson, Minister Neiba Kronu-i tanü metetdaktsü.

“Self Declaration ncovid-19 Nagaland App nung nisung 3905-i pei sasa tenüng züluokogo aser nisung 1165-i ano masü lir. Iba app nung register masürtem dang asütsü atema mepishir” ta paisa nenshia metetdaktsü.

“New Delhi nung Nizamuddhin Markaj sentong nung Nagaland nungi nisungtem oa adenba osang kar angazükogo. Iba tesem nung COVID-19 aketertem kar putetogo aser Nagaland nungi nisungtemji iba sentong nung oa aden mesüra iba tesem anasa liasü asütsü akok. Iba jagi onoki item nisungtem bushitepdar aser parnok shia dang nungi osang tejangja metetba sülen nüngdakba ama inyaktsü” ta Minister Kronu-isa ashi.

“Tanü agi anogo 8 buba state ajunga shibanogo aser iba nung nübortem yaritepa atema kanga pelar. Dimapur nung District Administration aser Police-i tanü nungi ozüng tesashiba alenshiogo aser iba nung Dimapur nung alirtemi tashi angaa yariteptsü mepishir” ta paisa shisem.

Minister Kronu-isa ashiba agi, tang tashi nung jangotsü, petroleum, oil, & lubricants (POL), mozütem aser tongtipang nüngdakbatem ajak peria dang lir aser District Administration-i jenjang metudaktsüi reprangshima arudar.

COVID-19 wara ajanga linük ajunga shibangba mapang All Nagaland Counsellors Association (ANCA)-i telephone ajanga counselling services agütsütsü mulungsoa nangzükogo, ta Kronu-i metetdaktsü.

Iba ya talisa Quarantine nung alirtem atema lir aser counselling aginürtemi 7005251298 nung WhatsApp ajanga osang metetpelatsü akok, ta paisa ashi.

Counselling indang mapang telemsa yamai asütsü:

* Clients at Quarantine Facility   : 10:00 am to 5:00 Pm

* Clients under Home Quarantine : 6:00 am to 9:00 Pm

* Anyone requiring Counselling    : 6:00 am to 9:00 Pm