Samsung anema ken o benok

May 27, 2017 (Agencies): Samsung Note 7 phone battery nung timtem adokba ajanga mepetmesü adokba samaa oya alidang, maneni Samsung phone tanga model tem nunga battery dak sendakba nung timtem adokba ajanga parnok anema ken o benokdar, ta osang ka ajanga metetdaktsü.
Kasa timtem adokba phone tem rongnung; Galaxy S6, S7 Edge aser Note 5 nunger nung timtem adokba metetdaktsüogo.
Iba ita tetenzüklen Massachusetts nungi Dale Holzworth-i ken o ka benoka liasü. Pai ashiba agi, Galaxy S7 Edge ka pai yaküm ali aser iba phone ya par jabaso takdang nung charge süa doktsür aliba mapang mi adok, ta osang ka ajanga Brehostibarnü metetdaktsü.
Osang ajanga ashiba US kübok state asem nung ken o benokba ajanga sayuba agi, battery nung mi adokba aser timtem aliba Samsung company-i meteta liasü saka parnoki nüburtem dang memetetdaktsü.
Ano tanga ken o ka New York nungi Claire Gilligan-i benokba nung, tanga smarthphone tem nunga note 7 nung amshiba battery tem mesüka mesüra kasa inoka lir, ta metetdaktsü.
Yaküm August ita Note 7 phone sayaba sülen ita ka tsüngda nung Galaxy Note 7 phone 112 nungi mi adoka liasü, aser iba ajanga phone sayar ita 5 tsüngda nung parnoki phone million 2.5 meyipa meshitsüsa aküm.
“Samsung-i nüburtem lendong-i idaktsütsüba phone yanglua ayoker,” ta complaint ka nung shia lir.
Plaintiffs-i Samsung model tejen amshirtem nema note 7 nem agütsüba kasa refund aser exchange programme agütsütsü asoshi akhang.
Parnoki ashiba agi, Samsung-i Note 7-bo meyipa agi, saka tanga lendong aketba phone tem shishilembadak toktsü, kechiyong iba tebilemtsü ya phone ka kicha nung dang masü tanga nunga lir.