Samsung-i ‘Gear S2 smartwatch’ sayaogo

September 01, 2015: Tanü asüng nüburtemi temang nung alenlokba oset kanga sapuba tensa den putepa Samsung-i Gear S2 smartwatch sayaogo.

Iba Smartwatch ya teapu ana nung adoka lir– Gear S2 aser Gear S2 classic.

Gear S2 anütettsü ya design tali keta aliba maginertem asoshi lir. Gear S2 classic ya tanak aser iba denji putepa teben nung alenloktsü atema shiküp tanak alenlokja lir.

Iba anütettsü telungtetji inch 1.2 aser screen resolution ji 360 x 360 lir. Anütettsü nung Tizen operating system keta lir aser optimized 1-GHz dual-core processor enokja lir.

Smartwatch Gear S2 aser Gear S2 classic naprongla ajanga email aser text message tem reprangatettsü aser yoktettsü, iba den külemi news aser calendar-a reprangtettsü.

Item anütettsü tem ya 3G dena sentakteptettsü, koba nung o jembitsü asoshi e-SIM ka enokja lir.

“Iba anütettsü amshirtemi pei teben ang khen meyipa reprang nung calendar, e-mail, news aser text message tem ajak reprangtettsü. Nüburtemi 3G den sentakteptetba Gear S2 ya amshi nung ajungtsü kechiba süra iba anütettsü nung o jembitsü asoshi e-SIM enoka aliba ya tan mezüngbuba lir,” ta Samsung-i ashi.

Samsung Gear S2 nung temang anepaluyim tetuyuba agütsüba dena enoksemja lir koba ajanga tamshirtem anema aliba nung kanga yaritsü.Aji dang masü saka temang tera tashi mait akümdang iba anütettsü ajanga tekaloker dang tekümdangtsüa metetdaktsür.

Samsung Gear S2 nung NFC technology dena lir koba ajanga bill-a agütsütettsü.

Samsung Gear S2 taseptsü dark gray sentsü aser tesendaktsüa dark grey lir.

Samsung Gear S2 and Gear S2 classic naprongla Tempodrum, Berlin nung September 03 nü ajak dang sayutsü sentong lir.