Samsung indang foldable phone ji tablet ama asütsü: DJ Koh

New Delhi, Mongputeni (October) 12 (Agencies): Samsung-i foldable smartphone ka yanglutsü lir aser ibaji tablet device ama amshitettsü ta parnoki ashir.
Galaxy F ta ajaba koleptetba smartphone ji tablet ka asütsü aser nü indang pocket nung phone ka ama bener senzütettsü, ta Samsung mobile division CEO, DJ Koh-i ashi.
“Kodang onoki foldable phone ka yanglua sayadir, ibaji ozü customer asoshi tajung asütsüla. Iba phone ji tamshirtem atema majung süra, ni iba ama products meyanglutsü” ta paisa osangbener dang ashi.
Malaysia nung Samsung Galaxy A9 sayaba sentong nung Koh-i osangbener den jembidang foldable phone indang osang kecha balaka mashi saka foldable phone ji kaket ka ama lapoktsü aser shibangtsü indang olen ka jembisem.
“Onoki foldable phone ayok tenzükdang, mezüng nungbo talir kanga malitsü saka lia lia teimba ayoktsü, kechiyong asenoki foldable phone ka nüngdaker” ta paisa metetdaktsü.
South Korea company Samsung-i küm aika foldable phone tebilemba lemsatepa arur aser taoba mapang Koh-i taruba ita San Francisco nung Samsung developer conference mapang foldable phone ka sayutsü ta metetdakja liasü.
Samsung foldable phone ajanga mobile handset shishilembaba nung tajangzük tulu agütsütsü. Alima nung smartphone yangluba company tulutibaji Samsung lir saka tang China nunger company Huawei-i parnok den meneptepa smartphone yanglur.