Samsung indang washing machine-a apoktsü tenzükogo

September 29 (Agencies) : Samsung ya tang Galaxy Note 7 smartphone meyipa yanglushiba mapang ka lir aser ano iba den bendenloka par company-i yangluba washing machine nunga mi adoker ta osang tejangja ngutetogo.

US Consumer Product Safety Commission (CPSC)-i, September 28, 2016 nü Korea nunger company-i yangluba washing machine apoker, ta sangdong ka ajanga nüburtem dang metetdaktsüogo.

“Samsung oset amshirtemi 2011 nungi tang tashi nung onoki indang washing machine tem kecha timtem melii amshi aruba asenoki meteta alitsüla,” ta CPSC-i temetetsü sangdongba sülen Samsung-ia sangdong ka ajanga ashi.

Tang timtem agütsüba washing machine tem ajakji March 2011 nungi April 2016  tsüngda nung yanglubatem lir aser ajakji top loading-washing machine tem lir, ta Samsung aser CPSC nati metetdaktsü.

“Yipten sü mesüra süoshi kanga aika aser tzü majemba süoshi ashiba mapang meimlaba washing machine kar kanga sashia anokshitsü aser ibaji ajanga nisung yiruba den osettsüseta raksatsü akok,” ta Samsung-i parnok website ajanga metetdaktsü.

Anungji iba model indang washing machine amshirtem ibala mesükba süoshi ashiba mapang delicate aser lower speed cycle ang amshiang, ta Samsung-i tetuyuba agütsüogo.

Georgia, US nungi arishi küm 32 tain, Melissa Thaxton-i, ozü washing machine nung sü teshidak nung apokdang ni iba anasaji nokdaka liasü, ta ashiba ABC News nung metetdaktsü.

“Iba apokba olaji kanga tulu liasü aser kü narong telung nung tapoktsü ka apoker mesüka liasü. Washing machine apokba sülen iba temüket nung wire, nut aser teküpbangtsü ajak atem sünga prokshi liasü,” ta lai ashi.

Iba lendong agi kongshir aliba nüburtem asoshi CPSC aser Samsung na sentepa lenmang kar bushitepdar saka parnoki iba lendong ya koma ser adoker iba osang tejangja ano memetetdaktsü.