Samsung Note 7 melena yangluba phone nunga mi adok

New York/New Delhi, October 6 (Agencies) : Samsung-i Galaxy Note 7 smartphone ji asenoki bilemba tang nungi tajungba ta ashir. Ajisüaka US tayimtsü ka nung Note 7 melena yanglushiba phone ka nung mi adok. Ibaji ajanga tayimtsü nung mena alirtem ajak aludaktsü aser moi atih.
The Verge osang ajanga ashiba agi, Bodhbarnü tayimtsüi atuba mapang Note 7 ka nungi mokozü adokba ngua Louisville nungi Baltimore-i aotsü aliba, Southwest Airlines flight 994 nung mena aliba nüburtem ajak aludaktsü.
“Tayimtsü nung amentsü pur aser crew ajak tayimtsü main cabin kishi nungi alu aser tang tashi nung shinga yiruba osang mali,” ta Southwest Airlines otongdari ashiba kasa osang ajanga metetdaktsü.
Note 7 tasenba bena alisang, Brian Green-i iba phone ya AT&T nungi September 21, 2016 nü ali aser tayimtsü attendant-i phone ajak switch off süang ta shili pa phone-a off asü sür nung mi odang adok ta ashi.
Green-i mokozü adokba metetli phone ji cabin atem nung tsükdaktsü.
Pai ashiba agi, phone nungi mokozü temelem ka adok. Iba phone jagi atema nung aliba carpet ajak rongpoka alu.
“Noksa ka nung square tanak ka lir aser ibaji ajanga iba phone ji Note 7 melena adokba phone lir ta jangjar. Green-i iba phone nung battery charge asüba temaitsü sentsü tanen (green battery icon) keta lir ta shi. Pai mi adokba phone melena Apple iPhone 7 ka aliogo,” ta Verge osang ajanga ashi.
Iba lendong atalokdang phone nung battery tashi noklang nung shilem 80 shi liasü, ta Green-i ashi.
Samsung-i, “Onoki iba phone tenük kuli mangu tashi Note 7 tasenba ajanga lendong agütsü ta meshitettsü. Onoki ketdangsertem aser Southwest nung aliba tayimtsü nung inyakertem den iba phone onok ket atongtsü atema inyaktepdar. Iba phone onoki kanga junga reprangdangba sülen osang teperi ngutettsü,” ta ashi.
Green indang phone ya tang Louisville Fire Department ket nung bushisüngdangtsü atema yua lir.
Taoba hopta India civil aviation regulator-i September 15, 2016 sülen yangluba mesüra, Samsung Galaxy Note 7 smartphone tasenba tayimtsü nung mamshitsü metetdaktsüogo.
September 9, 2016 nü Directorate General of Civil Aviation (DGCA)-i tayimtsü nung smartphone mamshitsü sangdongdang September 15, 2016 sülen aliba Note 7 phone tembo menokdanger, ta ashi.
Tayimtsü nung amshitsü melaba Samsung Galaxy Note 7 smartphone tem screen nungji battery charge asüba temaitsü sentsü tanen keta lir.
Samsung India otongdar-i, “Tang tashi nung onoki India nung Galaxy Note7 ka danga mayok. Galaxy Note7 kodang India nung sayadir iba phone nung ‘Green battery icon’ keta alitsü,” ta ashi.
Galaxy Note 7 smartphone battery nung timtem aliba ajanga tang Samsung-i ibaji yanglushidar.