Samsung tanaben Q1 smartphone temaba jenjangi tuogo

Seoul, April 29 (Agencies) : South Korea nung electronics tetsüti, Samsung Electronics ano tanaben alima rangben smartphone market nung temaba jenjangi tuogo. Parnoki iba jenjang ya ano Galaxy S8 masayadang ngutet, ta Honobarnü osang ajanga metetdaktsü.
Shishilemba asadangba telok, IDC-i South Korea tech tetsüti, Samsung-i taküm January nungi March ita tashi nung smartphone million 7.9 yokogo aser ibaji ajanga parnoki shishilemba shilem (Market share) nokang nung 22.8 % atong. Parnok den tokteper US indang Apple company tanabuba jenjang nung lir. Apple-i shishilemba shilem, noklang nung shilem 14.9 ngutet.
Yaküm October nungi December ita tashi nung Apple mezüng jenjang nung tua liasü saka tan melentepogo.
Galaxy Note 7 phablet ajanga takoksa bener arutsüaka Samsung-i küm nung tatembang quarter nung noklang nung shilem 18.5 tashi parnok shilem ajungketteta iba jenjang atong.
Parnok indang smartyphone tem charge asüdang mi adoker ta osang angashiba sülen parnok iba oset yangluba anen.
Samsung aser Apple na sülen Huawei Technologies, Oppo aser Vivo compay tema temaba pungu rongnung anidakdar. Parnok senteper shishilemba shilem 22.4% ngua lir. Iba shilem rongnung Huawei 9.8% ngua asembuba jenjang nung lir.
Parnok sülen Oppo-i 7.4% aser Vivo-i 5.4% nguteta pezübuba aser pungububa jenjangtem nung lir, ta osang ajanga ashi.
Samsung-i yangluba Galaxy S8 aser S8+ smartphone tasentem India nung sayar hopta ka tsüngba nung 80,000 tashi jilia manga lir aser ita tatem tashi nungbo phone 150,000 tashi jilia mangatsü imlar.