SanDisk-i 200GB Wireless Stick sayaogo

New Delhi, March 18 (Agencies) : Noksa aser video meyirjang aika kangasa kara lemsateptettsü atema SanDisk-i Hokolbarnü 200GB SanDisk Connect Wireless Stick ka sayaogo.

200GB SanDisk Connect Wireless Stick ya mezüngbo Amazon.in nung sen 9,999 agi ayoktsü aser iba sülenang tanga tesemtem nunga ayoktsü.

“Tatalokba aika ataloker aser nüburtemi noksa o video tem den nüngdakba file balala mobile nung meraksai kanga junga bendena ayutsü meranger,” ta SanDisk nung country manager — India & SAARC, Rajesh Gupta-i sangdong ka ajanga metetdaktsü.

“Nüburtemi kecha tebilemtsü melii tongtibang tatalokba balala rizünga ayutsü asoshi iba oset ya onoki yanglu,” ta pai shisem.

SanDisk Connect Wireless Stick nung SanDisk Connect app keta lir aser ibaji ajanga iPhone, iPad, iPod, Android osettem, Fire tablets, Mac aser computer balala nung mela mela amshitettsü. Iba nungji password ka aser Wi-Fi dena lir.

Iba den külemi SanDisk Connect Wireless Stick nung asenoki enokba noksa aser video temji AirPlay ajanga Apple TV, Google Chromecast aser Amazon Fire TV tem den ano 3D Touch iPhone 6s aser iPhone 6s tem nunga timtem meli reprangtettsü.