Sangküm April ita nung RSS ‘Army’ school tenzüktsü

New Delhi, July 29 (Agencies): Sangküm nungi tenzüka Rashtriya Swayamsevak Sangh (RSS)-i ‘Army’ school ka tenzüktsü aser iba school nungji kaketshirtem tarutsü nung armed forces nung officers akümtsü atema tesayuba agütsütsü.
Iba school ji RSS’ education wing Vidya Bharti-i ketdangsütsü aser school nüngjaji taoba mapang RSS sarsangchalak Rajendra Singh (Rajju Bhaiya) nüngtem nung ajatsü.
Rajju Bhaiya Sainik Vidya Mandir ji taoba mapang RSS tongti asoba tesem, Uttar Pradesh nung Bulandshahar district kübok Shikarpur nung amenoktsü.
Teburtem atema residential school yanglu tenzükogo aser iba school nung Central Board of Secondary Education syllabus agitsü. Iba school nungji Class VI nungi Class XII tashi alitsü.
West Uttar Pradesh aser Uttarakhand nung Vidya Bharti Uchha Shiksha Sansthan regional convenor, Ajay Goyal-i, “Iba ya tang mezüng linük nung tendanga tenzüker, aser tarutsü nung linük nung tanga tesemtem nunga lapoktsüa akok,” ta metetdaktsü.
Vidya Bharti-i linük nung school 20,000 dak tema lapoka lir. Linük nung aliba school tem nung Army education aser training agütsütsüji kanga tongtibang, ta RSS-i jembia arur. 1937 küm Nasik nung BS Moonje-i tenzükba Bhonsala Military School ya-a army school mesüka lir.
Goyal-isa, “Class 6 nung azüngtsü atema mezüngbuba shilem nung kaketshir 160 agizüktsü. Reservation scheme kübok taküm tenla agüja asür sepai chirnurtem atema menden 56 agütsütsü,” ta metetdaktsü.
Taküm September ita nung senden ka ayongzüka Retired Army officers-i iba school atema tebilemba onüktem lemsateptsü, ta shia Goyal-i, “Linük tesem balala nungi Army officers-i RSS den tongtepratepdar. Iba senden amentsü atema hopta ka tsüngda anogo shimtsü,” ta metetdaktsü.