Sangküm January tashi nung sorkar tesayurtem timi lemsatsü

Kohima, Mongputeni (October) 15 (TYO): Sorkar school tem tajungba kümdaktsütsü atema sorkar tesayurtem, talisa maths aser science tesayurtem mapa lemzüktsütsü ta School Education Advisor, K T Sukhalu-i ashi.
Directorate of School Education-i ayongzükba GHSS, GHS aser GMS nung Mathematics tesayurtem indang workshop tenzükba sentong nung jembidang Sukhalu-i “loktiliba ka tejakleni aotsü atema education aser health care kanga tongtipang” ta ashi.
Sorkar school aika nung maths aser science tesayurtem mali. Chief Minister aser State cabinet-i taruba final tatidang matongdang sorkar school tem nung maths aser science tesayurtem lemzüktsütsü atema ‘out teachers post’ kar melentsü telemtetba agiogo, ta paisa shisem.
HSLC aser HSSLC tatidangtem nung nil results anguba atema sorkari school kar jenjang ajemtsür saka department-i maths aser science tesayurtem mapa melemzüktsüba atema sasar aser ano school aika nung tesayurtem peria mali, ta paisa shisem.
“Jila nung aliba school tem nung tesayurtem talila lemzükja lir aser iba atema Department-i students-teachers ratio reprangtsü aser sangküm January ita tashi nung iba osang metetdaktsütsü. Ni külem MLA tem dang tesayurtem non-transfer asütsü indang shiditem mezülutsü atema mepishiogo,” ta Sukhalu-i ashi.
“Maths aser science tesayurtemi kaketshirtem dang jungjunga sayutsüla aser jangradaktsütsüla. Nai (tesayur) parnok dang sayuba kija masü saka nai sayuba yimya aser parnoki jangratsüsa angazükdaktsü jiang tongtipangba. Ibaji ajanga dang maths aser science tsübuba tangatetba koktettsü” ta paisa ashi.
Nagaland nung lanur aika lir aser parnoki mapa jenti inyaktettsü aser temaba jenjang atongtsü. Ajisüaka, asen state nung mapa manguba khuret tulu lir aser asenoki lanurtem nem shisaliok shitak mesayura aser len manira, parnok loktiliba atema khuret ka akümtsü. Iba tebilemtsü atema tesayurtemi bendanga agüja aser nendaka inyaktsü ayongzüker. Taruba HSLC aser HSSLC examinations nung sorkar school nung nil results malitsü alizüng atongtsü merangdi, ta Advisor-isa ayongzük.
Sorkar aser department-ia tekaraba nung sorkar school tem nung maths aser science tesayurtem den Head Master o Assistant HM mapa lemzüktsütsü merangtsü, ta paisa shisem.
Tanü sentong nung mendenji Additional Director Razouseyi Vese liasü, Assistant Director Visetonuo-i temoatsü meshia sarasadem, Director Wonthungo Tsopose-i tesentepertem pela agizük aser Principal Secretary Menukhol John-i anküp tepela o jembi.