Sangküm March ita tashi nung yimtsüng ajak nung light mesangoktsü: Piyush Goyal

New Delhi, March 03 (Agencies): 2018 küm May ita tashi nungbo yimtsüng ajak nung light mesangoktsütsü sorkar nükjidong liasü, ajisüaka tang tashi nung iba maparenji tuluka inyaker asünungji sangküm March ita tashi nungbo iba nükjidong atongtsü, ta Union Power minister, Piyush Goyal-i ashi.

New Delhi nung ORF-i ayongba Raisina Dialogue sentong nung jembidang Goyal-i, “Yimtsüng 18,452 nung light mesangoktsütsü mission kübok onoki tesüiba ita 11 tsüngda yimtsüng 6,029 nung light mesangoktsüogo. Onoki iba alizüng ya March 31, 2017 nü atongtsü,” ta ashi.

Yaküm Independence Day nü Ato kilonser, Narendra Modi-i onük jembidang, anogo 1000 (2018 May) tashi nung light memesangoki aliba yimtsüng ajak, 18,452 nung light mesangoktsütsü, ta sangdonga liasü.

Tamalen Goyal-i, taküm March ita tatem tashi nung yimtsüng 7,000 nung light inoktsütsü, ta metetdakja liasü. Minister-isa, Manipur aser Tripura nati UDAY scheme nung adentsü jangraba metetdaktsüogo, ta ashi.

Tang tashi nung state trok- Uttar Pradesh, Bihar, Rajasthan, Gujarat, Jharkhand aser Chhattisgarh state temi iba scheme nung adentsü tenangzüktep agiogo.

Maneni asüng Punjab-ia UDAY scheme atema tenangzüktep agitsü.

You must be logged in to post a comment Login