Sangma-i ‘Run for North East’ sentong tenzüktsü

Shillong, January 21 (Agencies): Meghalaya Chief Minister, Mukul Sangma-i ‘Run for North East’ ta ajaba 12 buba South Asian Games (SAG) milenpong bener asemba sentong Shillong nung tenzükja tanü Brehostibar nü agiogo.
“Asen state nung iba ama tongti asayamong ayongtsü maongka anguba atema kanga pelar,” ta shia, Sangma-i kilometer 5 densemba mini marathon sentongji tenzüktsü.
Tanü sentong nung Olympic medallist, MC Mary Kom; külem tsüngteper, Laishram Sarita Devi, Bollywood star, Milind Soman; Meghalaya minister-tem aser SAG tayonger luden nung züngsemertemi shilem agia liasü.
12 buba SAG asayamong ya Assam kübok Guwahati aser Shillong nati aroki ayonga taruba February ita 6-16 nü tashi asayatsü renema lir.
Ano külen, taoba mapang 5 ben tashi world champion akümla, Kom aser külem tsüngteper, Sarita Devi nati SAG asayamong qualifier tetoktepba nung takok ngua yashi, Bodbar nü shilem agiba osang jangjaogo.
Sarita-i P Basumatary quarterfinal nung tsükdakja SAG qualifiers nung shilem agitsü jenjang angu aser Kom-ia Soniya madak takok ngua maneni toktepa shilem agitsü jenjang ajangzük.
Külem senotsür, Sarjubala Devi, Aruna Mishra aser Pooja Rani nungeria pei asaya nung takok ngua temaba jenjang anguba osang jangjaogo.