Sania den külemi ser asayaba ya ni asoshi tia taka:Martina

Mumbai, November 22 (Agencies): Switzerland nungi tennis asayar tejen Martina Hingis-i Deobarnü, la den külem ser asayala, India tsür Sania Mirza tenüng sanga ashidang, la den külem ser asayaba ya ni asoshi kanga tia taka, ta ashi.
Mirza aser Hingis nati ano tan-a Singapore nung sen dollar million 7 alang WTA Final nung takok angu.
Taküm tena asoshi iba takok ya dena takok toku buba asütsü. Tenati Beijing, Wuhan, Guangzhou, US Open, Wimbledon, Charleston, Miami aser Indian Wells asayamungtem nunga takok ngua lir.
January ita nunga Sania-i Sydney International asayamung nung America tsür Bethanie Mattek-Sands den külem ser asayadang takok angu aser iba takokji dena lai taküm takok anguba ajak agi 10 jungogo.
“Taküm ya Sania küna asoshi takok küm lir. La ya asayar kangasa tajung ka lir. Küna prongi kati ka akhümtsübur. La asaya nung kanga dang mongin aser kanga meranga asayar. Mapang ajak nung küna tsüngda tesendaktep tajung aliba ajanga item takoktem bena aruteter,” ta Martina-i ashi.