Sania Mirza-i ‘Jewellery’ meimba lemsateper

Mumbai, August 04 (Agencies): Saisapong nung shilem agir karibo fashion kanga jangrar aser iba rongnung densema tan India International Jewellery Week (IIJW) nung Sania Mirza ramp nung jajaba mapang lai, ni tang asayar ka süaka, ni tanur asüdang nungi fashion aser jewellery meimer, ta ashi.
“Ni asayar nisüng ka süaka nia tetsür ka lir aser ibaji ajanga tangar tetsürtem amai nia jewellery meimer. Ni asayar nisung ka asüyongbo iba amala oset memeimtsü ta mali,” ta Hombar nü IIJW sentong lapokba mapang ashi.
Sania-i IIJW sentong nung ramp nung jajabaji kanga jangratemtsüka ta shia liasü.
Ajisüaka iba ya la asoshi mapa tasen ka masü, kechiba süra la ya Blenders Pride Fashion Tour, Indian Bridal Fashion Week, aser Global Fashion Show sentong akaba mapanga ramp nungsa jaja liasü.
Sania-i iba sentong nung designer Moni Agarwal-i yangluba “Zohrakshi” brand sayatsü.
IIJW sentong ya Brihostibar nü tashi akatsü. Iba sentong ya 2010 küm tenzük aser taküm agi joko trokben buba amunger asütsü. Iba sentong nung India nung purapiteta yanglutetba jewellery tajung aika sayar.
Switzerland tsür tennis asayar Martina Hingis den külemi ser Wimbledon nung takok anguba atema ni nüma tanga bilemer. Iba Grand Slam takok ya ni asoshi tetsür anana ser asayaba nung mezüngbuba takok lir, ta Sania-isa shisema liasü.
Tamalen-a tetsür/tebur temeyoktep asaya nunga lai Grand Slam ka bena lir.