Sania Mirza-i Padma Bhushan sempet agizükogo

New Delhi, April 12 (Agencies): India’er tetsür tennis asayar mongin, Sania Mirza-i Padma Bhushan sempet tanü, Mongolbar nü agizükogo.
Delhi yimtiba kübok Rashtrapati Bhavan nung sentong tajung ka agia, India Tir, Pranab Mukherjee-i India nüburtem nem agütsüba sempet tematiba rong nung tasembuba, Padma Bhushan Mirza nem tanü amoktsü.
Switzerland tsür, Martina Hingis den aroki lungjemer, Mirza-i Grand Slam 2 tashi densema, ajak agi takok marok 9 tashi yaküm, 2015 küm agizük aser iba nüngtem nung la nem nungtugu Padma Bhushan sempetji agüja liasü.
Lai takok jenti anguba yong WTA doubles asayar tarensen nunga Mirza-i World No. 1 akümtsü jenjang angu.
Hingis den aroki lungjemer, Mirza-i taküm 2016 küma Australian Open tetsür doubles takok marok agizüka liasü.
Tenati asaya 41 tashi atonga akokba sülen kasaji taküm February ita asayaba Qatar Open asayamong nung tembangba osanga jangjaogo.
Ano külen, India’er tetsür badminton asayar, Saina Nehwal aser lasang toktepa kashishir, Deepika Kumari natia Padma Bhushan aser Padma Shri sempet tawa agizükba osang jangjaogo.