Sania Mirza o Martina Hingis nati WTA Final kokogo

Singapore, November 01 (Agencies): WTA tennis final, Singapore nung Sania Mirza aser Martina Hingis nati takok nguogo. India aser Switzerland linük nungi asayar ana yagi Spain nungi Gabrine Muguruza aser Carla Suarez Navarro na madak 6-0, 6-3 agi takok ngua WTA nisung anana asayaba tarensen nung takok angu.
Iba asaya ya ghonda ka dak tera tema agia asaya aser iba takok ya dena tenati taküm takok tukobuba angur asütsü.
Mirza aser Hingis nati mezüng set kanga mela akokba sülen Muguruza aser Navarro nati kanga merangdanga asaya, ajisüaka tenati tanabuba set nunga game asem ang akokba ajanga tenati iba final asayatsü anogo ka lia nisung anana asayaba tarensen nung WTA World No.1 jenjang nguteter alila ana makok.
Hingis aser Mirza nati taküm final 10 asayaba rongnung 9 koka lir. Tenati Grand Slam 2 (Wimbledon aser US Open), WTA 5 ((BNP Paribas Open-Indian Wells, Miami Open, Family Circle Cup-Charleston, Dongfeng Motor Wuhan Open, China Open-Beijing), aser WTA International title (Guangzhou International Women’s Open) tem koka lir. Tang tashi nung tenati match 22 tashi atonga atonga kokogo.
“Tanü ya anogo kangasa tajung liasü. Sania-i kanga bendanga agüja asayaogo. Tanü la asaba moapu telungtet ajaklen liasü,” ta Hingis-i ashi.