Sanjay Dutt ‘De Dhakka’ film yanglushiba nung shilem agitsü

Mumbai, July 29, 2016 : Actor Sanjay Dutt-i Marathi film “De Dhakka” Hindi agi yanglushiba film nung tongti shilem agitsü. Iba film ya sangküm nungi tangoktsü.
July 29 nü arishi küm 57 ajungsang, Sanjay den iba film nung shilem agitsü pur ano tatem küma meshim.
Iba film ya Sandeep Singh aser Omung Kumar na meyong Legend Studios nung produce asütsü aser actor-director Mahesh Manjrekar-i direct asütsü, ta sangdong ka ajanga metetdaktsü.
Sanjay ket nung raradang amshiba prangpong ka aliba ajanga ken o adoka pa tepuokdak küm 23 tashi ayuba sülen taküm küm tetenzüklen chiok. Pa tepuokdak nungi chiokli nungi film aika nung shilem agitsü asüngdanger.
Sanjay-i “Total Dhamaal” film nung silem agiogo aser Siddharth Anand den film ka nung shilem agitsü liasü saka mapang tatsüka atema thinenogo.
Sanjay aser Manjrekar na tamalena “Vaastav: The Reality” film nung külemi inyaka liasü. Iba film nüburtemi kanga sapuba ajanga super hit aküm aser tang-a “De Dhakka” film yanglushiba nung külemi inyaktsü.
Manjrekar-i, “Ni Sanjay den külemi inyaktsü kanga junga shisadangogo kechiba süra ni tangari meinyakdangba mapa balaka inyaka nüburtem peladaktsüner. Sanjay adenba ajanga kibong aser lanurtem ajaki iba film saputsü imlar,” ta ashi.