Sanjay Dutt film meyangluzük tashi yi majemtsü nangzük

Mumbai : Sanjay Dutt film industry-i meyipa aitba filmji Siddharth Anand indang aruya aliba film asütsü ta liasü, saka iba sentong mapang talangka asoshi atsülanga aoba ajanga, Vidhu Vinod Chopra tenu Shelly Dhar-i mezüng direct asüba film ‘Marco Bhau’-i meyip.
Dhar-i la script renemshia alidang, küm 57 tain actor meyipba aruba filmji Omung Kumar indang tebu- jala mangyangba film ‘Bhoomi’ asütsü.
Iba film nung pa UP nunger ka ama adoker, aser iba asoshi kanga meranga inyakdar; koba nung yi majemtsüba ji-a densema lir. January tatem tashi nung film sapisayang ajak atemtsü aser iba sülen tatsüka lir Agra nung film ajak tangoktsü.
“Iba film otsü ya küm ana asem tejakdang nungi onok den liasü, saka actor tapet manguba ajanga metangoki liasü. ‘Bhoomi’ film otsü angashili Sanjay-i pa meyiba aruba filmji aji asütsü ta molungtet. Bachchan’er Diwali party nung yi ajembaji Sanjay asoshi tatempangbuba liasü, aser film matem tashi yi majemtsü nangzük,” ta Rajkumar Hirani ashi.
Iba den repsema film producer Sandeep Singh-i Mirror dang yamai ashi “Sanjay-i pa temang anepalutsü asoshi anepdangshia 5:30 nung saker gym nung meranga inyaker, anungji pa mapang meindoktsü asoshi pa takdang nung gym ka amenlokdar, aser pa den yaritepertem kar Agra-i anir aotsü. Agra nunger jembishinüba yim junga angazüktsü asoshi UP nungi tesayur ka bushia lir. Director aser otsü zülurtem den otsü yanglushiba nung knga meranga shilem agidar. Film nung par jala asütsü asoshi ano actress meshim, anungji iba shimba nunga kanga jangra inyakdar.
Iba film ya anoga 50 nung yanglutsü renema lir. Agra nung aser Red Fort, Chambal, Dhaulpur, Tajganj, Mehtab Bagh, Kinari bazaar tesemtem nung Sanjay-i act asütsü.