Sanjay Dutt-i kaket zülur anema ken o benoktsü sentong lir

Metsüremi 22, 2018 (Agencies): Bollywood nung nüngtugu actor Sanjay Dutt-i ‘Crazy Untold Story of Bollywood’s Bad Boy’ kaket zülur aser publisher tem anema ken o ka benoktsüba atema sentong lir, kechiyong pai shinga nema pa indang otsü zülutsüba atema temelaba magütsü. Pai ashiba agi, pa indang autobiography shidakbaji yakta adoktsü.
Sanjay-i social media ajanga Yasser Usman-i züluba aser Juggernaut-i publish asüba kaket dak sendakba nung olen ka lemsatepa liasü.
“Ni Juggernaut Publications mesera Yasser Usman nem kü taküm otsü zülua publish asütsüba atema temelaba agüja mali. Kü tenüng nung okatsürtemi parnok nem osang ka agütsüogo aser iba nung telangzüba agüja Juggernaut Publications-i ashiba agi, iba kaket ya osang tejangja anguba aser ajaki meteta aliba tatalokba dak ajemdaker züluba lir. Ajisüaka osang kakettem nung iba kaket indang shilem kar adokba nung ya kü indang interview tejentem kar densema lir, saka tanungba ajakji 1990s’ tabloids aser gossip magazine tem nung ajemdaker züluba lir koba nung osang timba ka teyazü lir. Ni taruba jenjang atema kü legal team den asadangtepogo,” ta pai zülutsü.
‘The Crazy Untold Story of Bollywood’s Bad Boy’ kaket nung ya Sanjay tsürapur Sunil Dutt aser Nargis Dutt na ajurutepa kibong akümba nungi tenzüka pa asoba aser pa boarding school nung azüngba, pa tetsü asüba aser pa tebu o adianu den tesendaktep aser pa temesepba mozü achiba indang ajak züluja lir.
Iba kaket nung pa tetsürden medemba aser pilaba aser 1993 Mumbai serial blasts ken o dak sendakba nung underworld don tem den tesendaktep aliba ajak züluja lir, koba pa indang nüngtugu film Munna Bhai MBBS den kanga mesüktepa lir.