Sanjay Dutt-i KGF Chapter 2 nung shilem agitsü

Chiteni/July 29, 2019 (Agencies): Ajaki yongyaa aliba KGF: Chapter 2 film nung Sanjay Dutt-i shilem agitsüba osang film yanglur aser actor napronglai jangjatsüogo. Yash-i tongti shilem agiba film nung Sanjay-i Adheera shilem agitsü shiba antagonist tem rongnung tongtiba asür. KGF: Chapter 2 nung shilem agitsü aliba ya Dutt asoshi South Indian cinema nung mezüngbuba film asütsü.
Film nung Dutt terprangtsü mezüngbuba Hombarnü Sanjay sor küm 60 ajungba nü Twitter ajanga lemsatepa liasü. Trade analyst Taran Adarsh-i film nung pa indang character poster ka lemsatepba den yamai zülutsü, “Sanjay Dutt #Adheera ama #KGFChapter2…nung adoktsü #SanjayDuttAsAdheera.”
Ita ana tejakdang iba film ya tangok tenzükogo aser film yanglurtemi Dutt aser Raveena Tandon dang film nung shilem agitsü asoshi asüngdangogo, ta osang adoka liasü.
Taoba mapang nung osang kecha mejangjai liasü aser Yashi-i ashiba agi, film nung Dutt nem villain shilem agidaktsütsü asoshi jembishinüdar. Anogo ishika tejakdang KGF: Chapter 2 yanglurtemi Adheera character indang teaser poster ka lemsatepa liasü.
Iba film ya Prashanth Neel-i direct asütsü aser Srinidhi Shetty-ia tongti shilem agitsü. KGF: Chapter 1 koba Shah Rukh Khan indang film Zero den mapang ka nung sayaa liasü, iba film ya Neel-i direct asü.