Sanjay Dutt-i tai atoktsü masüngdang:Okatsür

Mumbai, September 25, 2015: Maharashtra Angh, C.V. Rao-i magizüktsüsa Sanjay Dutt-i tang tashi nung taitok meshia khen danga shidi mezüludang, ta actor, Dutt meyong okatsüri Hokolbar nü metetdaktsü.
Advocates Hitesh Jain aser Subhash Jadhav nati, Justice Markandey Katju-i Dutt den ano puoka alir anati tatok meshiba Anghi magizük ta ashiba dak ajemdaker iba o jembiba lir, ta külem sangdong ka ajanga ashi.
“PK” film nung shilem agisang, Dutt ya par jala treatment agitsü asoshi August 27 nü nungi tepuokdak sodi meshir adoka lir.
“Iba ama taitok meshiba shidi ka danga Dutt mesüra par kibongi Angh nem magütsü. Aji dang masü saka pa aser par kibongi taitok meshiba shidi zülutsü asoshi Justice Katju den khen danga oa majurutep,” ta sangdong nungsa shia lir.
Dutt ya 1993 küm March ita nung ‘Mumbai serial blasts’ ken o nung aitsüba sülen tepuokdak ayurba lir.
Pa 1996 küm puoka ayuba sülen ita 18 lir khen bail angu. Ano 2013 nung küm 5 puoka ayutsü obendang agütsüba sülen Pune nung aliba Yerawada Central Jail nung anünga aliba ita 42 ayutsü asoshi belena anir ao.
Iba küm ponguji 2016 küm tetezük mesüra tatemlen abensatsü aser iba sülen pa tepuokdak nungi nüji angutsü.
Pa yakta nüji angutsü, ta sangdong ajangasa metetdakja lir.
Kasa sangdong ajanga, “Dutt-i taitok meshia shidi züluogo ta asübaji, Justice Katju-i pa mulungka agi jembirba dang lir. Sanjay Dutt ya temelaba melii prapong ayuba ajang Arms Act kübok aija tepuokdak ayu saka joko pa chioktsü mapang ana nung lir,” ta ashi.