Sanjay Dutt taküm otsüji temulung shirangtsüka asütsü: Hirani

October 31, 2015: Tang Sanjay Dutt taküm otsü nung ajemdaker film yanglutsü alisang aser pa den tembar chichiba, blockbuster director, Rajkumar Hirani-i, pa taküm otsüji jangratemtsüka aser temulung shirangtsüka asütsü, ta ashi.
“Dutt taküm otsü ya kanga temulung shirangtsü ka asütsü aser terepranger kanga jangratemdaktsütsü. Ni yangluba film tangatem mesüka iba film nunga kanga menütsüsa yimya yimponga enoka lir. Ni tangar ka taküm otsü kanga lemsatepner aser iba rongnung Dutt taküm otsü ya-a ka lir,” ta Mumbai nung 17buba Jio MAMI Mumbai Film Festival mapang ashi.
Honibar nü iba sentong akaba mapang Hirani aser film zülur Abhijat Joshi nati blockbuster koma yanglutsü ibaji lemsatepa liasü.
“Nisung ka indang taküm otsü agi film yanglutsüji mapa kanga temelabo masü. Nisung ka akümliba otsü gondha asem tsüngda nung sayutsüji mapa kanga tasak lir. Iba film asoshi mezüng züluzüpong maparen asoshi “Munna Bhai M.B.B.S.” nung tongti shilem agisang den gondha aikasa menogo,” ta Hirani-i ashi.
“Abhijat kenati Dutt den aonung 25 tashi ajurutepogo. Aonungshia otsü angashibatemji tatsü akümtsü kanga tasak,” ta paisa ashi.
PK film yanglusang-i, iba amaji pa den ajurutepba mapang pa jemjayijemba otsüa khenübo süoka jembiogo, ta ashi.
Iba film nung Ranbir Kapoor-i Sanjay Dutt ama shilem agitsü aser iba project ya taruba küm nungi tenzüktsü sentong lir.
Asür Sunil Dutt aser Nargis Dutt na jabaso, Sanjay Dutt ya Rocky, Vaastav:The Reality, Agneepath aser Khalnayak film tem ajanga kanga nüngtugu aküm aser 1993 Mumbai bomb blasts dak sentakba nung ozüngi memelaba prangpong yua aliba ajanga pa tang tepukdak lir.