Sanjay Dutt tangbo ‘Gandhigiri’ yimya ama alitsüla: Shatrughan Sinha

Mumbai, February 28, 2016 : Shatrughan Sinha-i Sanjay Dutt tepuokdak nungi chiokba atema kanga pela liasü. Actor liasüba yimten yimsüsür akümsang, Sinha-i, “Sanjay-i 2006 küm “Lage Raho Munna Bhai” film ajanga tatshitsü tajung sayuba ama ‘Gandhigiri’ yimya nung alitsü nüngdaker,” ta ashi.
Shatrughan-i, “Yerwada Central Jail (YCJ), Pune nungi pa chioktsü asoshi yongyaseta aliba kinüngertem asoshi nia densema pelar,” ta twitter ajanga lemsatepa liasü.
“Pai Munnabhai MBBS film ajanga tayongzükba agütsüba ama Sanjay Dutt-i Gandhigiri yimya ama alitsüla. Pa tepuokdak nungi chioktsü atatepa aliba par kinüngertem aser pa sapurtem ajak atema ni kanga pela bilemtsür, ” ta Shatrughan-i Deobarnü twitter ajanga lemsatep.
1993 küm Mumbai blasts dak sentakba prangpong ka pa ket nung aliba ajanga küm 23 tashi okadak aser tepuokdak lia aruba sülen taoba Brihostibarnü chiok.