Sanjay Dutt tepuokdak nungi February ita chioktsü

Mumbai, January 06 (Agencies): Nüngtugu Bollywood actor, Sanjay Dutt tepuokdak nungi taruba February 27 nü chioktsü renemba osang ka angazükogo.
Taoba mapang, 1993 küm Mumbai bomb lendong atalokdang ozüng alema tongpang nung amshitsü prangpong abenba ken o nung aitsüba sülen Supreme Court-i Dutt tepuokdak puoka yua merenshitsü o bendang agütsü.
Ajisüaka, Dutt-i Pune kübok Yerwada tepuokdak yimya tajung benshia aliba yong pa nem agütsüba temerenshi mapang tembangba jakdang pa tepuokdak nungi chioktsü lemtetba osang ka tepuokdak ketdangsertemi metetdaktsüogo.
Supreme Court-i Dutt Arms Act ken o nung 2013 küm aitsü aser pa tepuokdak küm 6 tashi puoka yua merenshitsü obendang agütsü.
Iba o bendang agütsüba jakdang Dutt-i kasa ken o nung ajemdaker ita 18 tashi tepuokdak aliba yong pa Yerwada tepoukdak puoka tanüngba temerenshi mapang, ita 42 tashi puoka alitsü lemzüka liasü.