Sanjay Dutt tepuokdak nungi March 7, 2016 nü chioktsü

Pune, December 08 (Agencies): Supreme Court-i 1993 Mumbai nung bomb pokdaktsüba lendong indang ken o nung aitsüba sülen tang tepuokdak puoka aliba Bollywood actor, Sanjay Dutt tepuokdak nungi taruba 2016 küm March ita 7 nü chioktsü renemba osang ka sorkar ketdangsertemi tanü Mongolbar nü metetdaktsüogo.
“Mepaidoktetba timtem kar majurura, Dutt-i tanüngba ita 42 tepuokdak lir külen taruba küm March ita 7 nü tepuokdak toktsütsü,” ta parnoki ashi.
TADA temzüng kübok kiralongratsü merangba ken o nungbo Dutt-i aibelena meinyak ta kuli bushita pa metentsü saka pai ozüng alema tongpang nung amshitsü prangpong injang par kidang rizünga ayuba ken o nung pai aibelenba bushiteta pa tepuokdak küm 5 tashi puoka ayutsü teremenshi agütsü.
Supreme Court-i Dutt nem agütsüba bail agiener külen hopta 4 tsüngda nung pa pasasa bendanga agütsütsü tuyu aser Dutt-i iba tetuyubaji agizüka March 16, 2013 nü sorkar nem bendanga agütsüba sülen pa Arthur Road Central Jail nung puoka ayu.
Ajisüaka, hopta ka shi lir külen, Dutt Pune nung tentetba Yeravada Central Jail-i anir ao aser tanü tashi iba tepuokdak puoka lir.