Sanju Samson aser Charulatha na kibong kümogo

Luchii/December 22, 2018 (Agencies): Charulatha den küm talangka medema arur India nunger cricket asayar Sanju Samson Küptoknü kibong kümogo. Samson-i pa Charu den medemba taküm küm Rongjui/Sept nung metetdaktsü aser mapang tatsüka lir dena Luchi/Dec nung kibong akümtsü, ta sangdonga liasü. Kerala nungi asayar ya tang Ranji Trophy nung masayar anungji iba ya mapang tajung ta angateta kibong kümogo.
Samson Kerala nungi taruba hopta Punjab den asayatsü aliba nung shilem agitsü imlar. Tena ya Thiruvananthapuram anasa Kovalam nung resort ka nung tomelang sentong ka agia Küptoknü anepdang kibong kümogo.
“Onok kinunger 30 sentepa sentong tongmelang ka agiogo. Kibong anaprongla nungi temoatsü anguba atema küna kanga pelar,” ta Samson-i ashi.
Tena ya Mar Ivanios College nung azüngdang nungi metetepa liasü aser Charu tang post graduation atema züngdar.
Samson ya national team setup nung dena mali. Aami/June nung yo-yo test majangtetba sülen pa India A nungi anitet. Chiteni/July nung Samson fitness test ajangtet aser Bengaluru nung India A, India B, Australia A aser South Africa A asaya nung India A squad nung tanaben anioka liasü.
Samson ya Rajasthan Royals puri IPL 2019 auction masü tsüngda tanaben agiogo saka pa tawa junga masayateti arudar. Vijay Hazare trophy nung asaya trok nungi pai run 115 dang yanglu aser Ranji trophy asaya nunga pai run 198 dang yanglu.