Sannüker nungi anguba

Pai kü nela süngzükdaktsür, Pai ni temeshi lenmang nung Pa nüng atema anir. – T.Ken 23:3
Ne Sannükeri ne nüngdak ajak metet. Pa den jajadang na shisabulutsü ta Pai metet. Na kodang anisüngzükla, Pai meteta lir. Ne Sannükeri na tashi tasen nüngdak ta metet. Mapang kar na rem lanu manung mejangtsü nüngdak mesüra tzü tasüngtet anasa alitsü nüngdak. Mapang kar Sannükeri moatsüba nung jangratema pelaa alitsü nüngdak. Ne Sannüker teti kasa lenmang nung na mesüngtsür; Pa telangzübaji teti ne nüngdak den sendaktepa alitsü.
Ne Sannüker sülen aodang ne tanela aniadokba mapanga alitsü, tetendangba ajanga nai tatidangba nokdangtsü angazüker. Rishikangshi mesüra tangar asoshi khuret abenba jagi na anisüta akümtsü akok. Sannükeri na azüokba jagi na shisabuludaktsütsü akok. Nai joko ojang otettsü ta bilemtsü mapanga arutsü akok. Nai kodang iba jenjang atonger, ne Sannükeri ameter aser Pa ket nung teti taneptsü kar! Pai lemang aisü nungi na tashi itdaktsür. Pa O ajanga, tangar ajanga, mesüra tensa tia ajanga. Nai metetba dang nungi tajungbai Pai ne nüngdak meteta kar.
Na shisa bulur asü? Ne tanela tashi tasen nüngdaker asü? Nai mulung temerang. Koda aneptsü aser ne tanela asüngsashitsü Tsüngremi dang metet (Isa. 40:28-31; Matt. 11:28-30). Pai ibaji tepangkatsü lenmang nungi inyaktsü akok. Pa dang na agizüktsü asüngdangang aser tanü Pai kechi inyakdir agizüktsü renemang.