Sannüker nungi tesünep

Au, ni tasü akhüm ayongküm ajanga jajaaka, ni kecha lendong metsübutsü, kechiaser Na kü den lir. Ne mechi aser ajok agi ni sünepdaktsür. T.Ken 23:4
Tsüngrem chir ka ama na kodanga kisüng malir! Mapang ajak nung ne Sannüker ne den lir. Ne tia nung nai Pa kodanga majatsü. Pa kong lir ta na kodanga süngmanga malitsü. Mapa kanga tasak arur dang Pai na toktsüogo ta tsübua malitsü. Pa ne jakdang aor; Pa na anasa jajar; Pa ne sülen arur. Pai na kümzüka kümzüktsü. Pai alushijak shia anguba aser metetba ama Pai ne kolak nung khu ajak züngtetta lir, anungji Pai teti na repranger (Luke 12:6-7).
Nai Pa angutsü makokdanga Pai teti ne dak tenük yoker. Ne tejashi mapang Pai teti Pa tashi tait agi na süneptsür. Pai tasü akhüm lenden ajanga na anir. Nai aginüba ama Pai lendenji meketa manir. Na tasü akhüm lenden ajanga jajatsü mapanga ajurur. Sannükeri ibaji paitoka na manir, saka ibaji ajanga Pai na anir. Item mapang ajak nung Pa na anasa jajar, aser na ailen jajaba tepiyong Pai na meimer aser ne den lir ta nangzüker. Iba mapang nai Pa temeim aser aria bilemtsüba tali taroki ia angatetter.
Na kodanga tsübua alitsü menüngdak. Tamajungbai na tsübudaktsüba ama ne Sannükeri na kodanga tsübua metoktsütsü. Pai tamajungba ajak madak takok. Tamajungbai Pa kodang aputsü makok. Ne Sannükeri kong aser kodang na timtem ajurutsü metetta lir. Ne Sannüker tajungi na tasü akhüm lenden ajanga aodang Pai na awabangtsü aser Pa temeim sayutsü ta ne mulungjang ajak agi amangang.