Sannükertem ola

Khristantem reshikangshir yimten telok anema Aor Baptist sannükertemi nokdaktsü aser election mapang nung vote meinoktsütsü renemba pangzüngji India nung Khristan yimsü anemertem anema tongpang ayongzükba mapa ka asütsü. Atangji, linük nung Khristan yimsü anemertem mapa tesashiba-tesashiba akümba agi sannükertemi iba ama telemtetba agitsüsa aküm südi ta angateter. Tanü asenok tamangertem ya temekonga masü aser tatsüka masü, tenüng agi amangertem kanga agia teimba, anungji yimten tashi (political power) aser rongsen bushidang asenoki Yisu amadoker aser mashi telok ka nung adener aser mashi-mashi inyaker. Iba jagi election nung dang takok ngurbo Khristan masüyonga ojang ta bilemba Naga nunger Khristantem rongnung yimten lenir aika lir. Aji oda, ruling government nung dang denra Khristan yimsü anemba telok nung adenyonga kecha masü ta bilemba Naga nunger Khristan aika lir. Iba jagi tanübo ‘Naga lima Khrista asoshi’ ta jembia-jembia Khristan yimsü anemer teloktem nemang Nagaland amokbangdaktsütsüsa Naga Khristan-tem libaliroba angur. Atangji, Naga Khristantem onsara ochimashi aser majung aküm nungji, limapurtemang Khristan yimsü amangertem dang nungi ochitashiba inyakba angur. Ibaji Naga Khristantem asoshi taaktsüka aser tayongzükba tuluka asütsü. Iba jagi kuli tajung ka angu ama bilema Naga nunger Khristan-tem aika Khrista yimsü anemba telok nung dendagi. Iba jagi parnok nem alima nung jangratema alitsü teimla ka agütsür. Iba telok jagi linük nung yimsü asütsü, anungji iba yimten tashiji amshia Nagaland nung yimsüsütsü maongka angutsü aser yimten tashiji amshia rongsen bendentsü ta Naga nunger yimten lenirtemi aikati bilemer. Iba ama alima teimla jagi tamangertem aika meyipsadagi. Aji oda, alima kintem dangi missionary meyirijang ter yoktsü purtem to Khristan anemba telok nung adentsü jangraba mapangji tang ya lir. Ibaji Naga Khtistantem asoshi tatidang tulu lir. Iba mapang ya, Yisu Khrista alima nung Pa mapa tenzüka maodang Pa dang mojingi alima chuba yimli ajak nü nem agütsüdi, nai long ajak yagi am kümdakjang ta atidangba amai lir. Iba kasaji tanü Naga Khristan-tem dang chuba yimli agütsütsü asoshi Naga nunger mulungjang aser tangatetba ajakji sen aser chiyongtsü agi süngdaktsütsü ajungshir. Ibayongji, tanübo Khristan yimsü anemer telok asüyonga Khristan purtem den o tajung jembia terenlok mapa inyaktsütsü meranger. Aji oda, asenoki sen aser amtsük dang aginür asünungji aji agütsür. Asenok Naga Khristantem dak yimten tangatetba mali, anungji shibai sen aser amtsük agütsür ta asüba tsütsü dang repranga anogo shia telok balala sülen anidaktsü. Iba ama tamangba yimsü nunga jangjamajang aser yimten nunga tangatetba mali ta lenla nung tangar nem amtsük agi mesüzüdaktsüba mapang, Aor sannükertemi Khristan yimsü anemer telok nem vote magütsütsü ayimoktsüba olaji amangba purtem ajaki hau ta agizüktettsüla. Atangji, karibo Khristan yimsü anemba telok nungji dena shilem agi nungang Khristantem anema meinyakdaktsütsü ta bilemtsüa akok, ajisüaka ibaji mapa küma inyaktsübaji tamakoktsü asütsü. Khristan taküm ka liyonga aotsüba ya tanüla tongpang agi sünga lir aser aiben alima tsütsübo akoksatsüsa tensa mapang ajurutsü. Idangji, hon dang nungibo Yisuang shimdi ta asüba tanüla tangatetba nung peisasa telemtetba magitetra, tanübo ajunger amai asütsü saka asüng majungtsü, asenbo jangratema alir amai asütsü saka asen chirnurtembo meshimetsür jenjang nung timtema alitsü. Aji oda, asenok alima nung tasoshia linüra aser asen chinurtem nem alima senmang amangdaktsünüra, tanü ajung masali saka Kibuba dak amanga tajung aser shitak inyakdi. MLA akümtsü mechi, mapa ka angutsü mechi mesüra sen tera angutsü mechi, tanü asenoki Yihuda Iskariot ama, Yisu yokadoker, Yisu anemertem den külemi sademsadema jangratema alitsü merangra, ibaji asenoksasa asenok soseta asütsü sentong yangluba den kasa asütsü. Iba ama lendong jagi maitsü asoshi tanü sannükertemi ayimoktsüdang, asenoka parnok sülen tashi angaa anidaktsüla.