Sanofi aser US mitkar nati Zika mozü yanglutsü

Paris, July 06 (Agencies): France nung tentetba tongti pharmaceutical telok, Sanofi aser US mitkar nati aroki lungjemer Zika tashidak nungi kümzüka alitsü mozü yanglutsü tezüngzüktep agiba osang ka Sanofi teloki tanü, Bodbar nü metetdaktsüogo.

US mitkari ketdang asüba Walter Reed Institute-i research agia mozü yangluba sülen kasaji koya shiruru dak tendanga koya shiruru Zika tashidak agi meshirangba kuli tawa bushiteta lir aser iba research takok ngua agiba osangtsüsang Sanofi telok den lemsateptsü nangzüktepogo.

“US mitkartemi takok ngua agiba research dak ajemdaker, ozü telokia research maneni agia, nübur taküm Zika mesen nungi kümzüktsü nükjidong nung iba tashidak nungi kümzüka alitsü mozü tekaratiba mapang nung takok ngua yanglutettsü alizüng yua lir,” ta Sanofi nung Executive Vice President, David Loew-i metetdaktsü.

Yaküm, 2016 küm tanaben poktetshiba sülen Brazil linük kisüng nung nisung million 1.5 shi Zika tashidak agi shirangba osang bushitetogo.

Mashisa aliba tetsürtem Zika tashidak agi shirangba sülen parnoki asoba kinü tanurtem dak microcephaly ta ajaba tekolak temang den meputep uluba timtem ajuruba kuli nguteta lir.