Santiago nung nisung million 3 tzü tajemtsü mali okrongdar

Santiago, April 17 (Agencies) : Chile yimtiba Santiago yimti atema tzü agiba tongtibang ayong anaprongla nung jana aser anakona onsara tali adokba ajanga yangji aliba nübur million asem shi tzü tajemtsü mali kanga okrongdar.
Iba tebilemtsü ya Deobar nikongdang nungi balaka adok aser ibaji ajanga yimti ketdangsertemi Santiago tesem nung “red alert” sangdongogo, ta EFE osang ajanga metetdaktsü.
Santiago nung netsüng yongsük ajak agi million 6.2 lir.
Iba tebilemtsü asoshi takok tashi meranga inyaktepdar aser tensa tajungba kati anir aotsü atema mera ajak agidangdar, ta national emergency management office ajanga metetdaktsü.
“Onoki iba ama koda masüba tensa ajurudang amshitsü atema renema ayuba rongdak sentong amshitsü. Yaküm onoki tzü rizünga ayutsü atema tsübu aika wazüka ayu aser tzü benlenshitsü atema truck tulu 60 renema yua lir,” ta yimti nung ketdangser rongnung ka, Claudio Orrego-i metetdaktsü.
Aguas Andinas company-i Chile yimtiba nem tzü tajemtsü agütsür, ajisüaka Honibarnü nungi tenzüka iba tebilemtsü ajuruba sülen tzü kodang ang merüktettsüar mejangjatetba agi parnoki tzü agüja aliba tesem 52 rongnungi tesem 27 nem tzü magütsütettsü ta osang agütsüogo.
“Mapocho aser Maipo ayongtem nung Honibar anepdang 8:00 ako nungi jana-ona onsara tali adoktsü tenzük, ta Aguas Andinas company-i ashi.
Chile tiyonglen tsüngsang mopung majungba ajanga Maipo aser Mapocho ayongtem menena kümdaktsü aser mapang tatsükabosa tang dang nungi tzü temenenba alitsü, ta meteorological osang ajanga ashi.