Sanya-i project tasen ka tangok tenzüktsü

Tsüklai/February 02 (Agencies): Sanya Malhotra-i ashiba agi, director Anurag Basu indang taruba film atema tangok tenzüktsü renemdar. Star tongtibang temi shilem agitsaü aliba film ya taküm küm September 6 nü sayatsü ternemba lir.
“Anurag Basu indang film atema ni takaraba nung tangok tenzüktsü. Iba maparen nung ajemoka tenzüka aotsü asohi ni kanga yongyar,” ta Sanya-i ashi.
Nüngja agüja maliba film ya India kübok yimti tulutem nung ajemdaker nüburtemi mepaidoktetba timtem ajuruba otsü balala pezü tashi lemsar yanglutsü, ta osang ajanga metetdaktsüogo.
Bhushan Kumar-i produce asütsü aliba film nung Abhishek Bachchan, Rajkummar Rao, Fatima Sana Shaikh, Aditya Roy Kapur aser Pankaj Tripathi nungeri tongti shilem agitsü.
Maneni, Ritesh Batra indang ‘Photograph’ film atema Sanya-i yongya atadar. Iba film nung lai Nawazuddin Siddiqui den shilem agiogo. Tan US nung tagidak aliba Sundance Film Festival sentong nung iba film premiere süogo.
“Anogo ana tejakdang ni Sundance Film Festival nung dener tang ni India-i meyipa aruogo. Sentong nung ‘Photograph’ sayaa telangzüba tajung aika ngua liasü. Kasa film ya Berlin Film Festival nung sayatsü atema yongyar,” ta Sanya-i ashi.
February 7 nungi tenzüka 17, 2019 nü tashi ayonga agitsü aliba Berlin Film Festival sentong nung ‘Berlinale Special films’ telemsa kübok ‘Photograph’ film present asütsü renema lir.