Sapon yanglutsü aser konger tsünütsü atema seminar agi

Dimapur, January 12, 2017 (TYO): LBES Mission Centre Vankhosung nung January 11 nü women Self Help Groups (SHG) purtem atema sapon yangluba, aser konger züsentetba angazükdakja anogo ka piyong seminar agiogo.
Iba sentong nung tesayur aser shisalen tuyur, Mhalo Tungoe-i ashiba agi, self help group tenzükba nukjidongji tetsürtemi pei sasa sen aatettsü asoshi lemang bushiba nung yaritsü, aser iba ya senotsü nung tangar dak memetaloki alitsü asoshi lir.
Konger ya Nagaland nung tesem aika nung tsünür, aser konger tsünütsü asoshi tajungtiba itaji April nungi May tashi aser September nungi October tashi lir, ta lai ashi. Maneni yimya balala, koba ajanga konger junga tsünütettsü, komala oset amshitsü, konger anepaluba nung jenjang balala aser koda aruhtsü, item ajak indang lai tatongi inyaka sayu. Konger koba nung miim ali, aser komala chiyungtsü den aso nung mapet, item ajakji shilem agirtem dang rasaa ashi.
Asen lima aser kima peria anguba aonsotsü aser süngjanglijang nungi koda sapon yanglutsü, aser iba ajanga koda sen aazüktsü, aser tali indokba nung kümzüka yutettsü, item ajak laisa rasaa ashi.
Seminar nungsa shilem agirtem nem konger tsünüdang amshiba osettsüset balala aser metsüjang angati lema agutsü.