Saradha ajanga Mamata sorkari nüburtem sen auyaogo: Rahul

April 23, 2016 nü West Bengal, Howrah district kübok Shyampur nung assembly election atema nüboyim lokti senden ka nung Congress tatong Tir, Rahul Gandhi, Congress-CPI(M) teloktep candidate, Amitabha Chakraborty (abelen) aser West Bengal Congress Tir, Adhir Ranjan Chowdhury nunger adenba noksa ka angur.

Kolkata, April 23 (Agencies): Honibarnü Congress tatong Tir, Rahul Gandhi-i West Bengal nung Mamata Banerjee’er sorkar aija, “Saradha chit fund ochimashi ken o ajanga sorkari nüburtem dang nungi sen auyaogo,” ta ashi.
Tanü Howrah district nung assembly election nüboyim lokti senden ka nung jembidang Chief minister Mamata Banerjee-i aniba sorkar aija Rahul-i, “Nenok nem anema alibaren, shisaliok aser mapa agütsütsüji sorkar mapa lir. Iba sorkar yagi ibaji meinyak. Ajisüaka iba sorkar yagi nenok sen aser nenoki rizüngba sen ajak Saradha chit fund ajanga auyaogo,” ta ashi.
Paisa, sorkari state nung mapa agütsütsü onük nung tamakok nguogo, ta ashi.
“Tamalenbo nisungtemi mapa bushia Bengal-i aru, ajisüaka tangbo parnoki tanga state temi ang mapa bushia aoer, kechiyong Mamata’er sorkari state nung mapa magütsütettsü ta parnoki ratetogo,” ta Gandhi-i ashi.
Rahul-isa Ato kilonser, Narendra Modi aija, “Yangi (Bengal) Mamata-i yazü nangzüker aser yangji (Delhi) Modi-ia kasa inyaker,” ta aitsü.
Senden nung adenshia alirtem dang Rahul-i, party nem vote agüja takok ngudaktsüra Congress-i state nung lanurtem nem mapa agütsütsü, ta nangzük.