Sarasadem tashi

Khristan ka taküm nung tashi tulutiba aruba lenmangji sarasadem ya lir. Asenok yabo yutsür, Tsüngrem chir Yisu Khrista taküm nunga kodang Pai sarasadem, idangji dang kotak kishi lapok aser kotak tenyar posü ozü ama kümer aluagi Pa dak atem aser yangji alirtemi angashia Tsüngremi ya kü meimba jabaso, ni nü dang pelar ta ayimoktsü. Sarasadem tashiji aji lir. Iba Lai tapu Luke 3 nung ashiba ama, nisung ajak den Yisu dena tzü nung tzüsener külen Pai sarasadem masü nungbo kotak kishi melapokla aser kotak tenyartema aluagi Yisuji Tsüngrem chir ta kuli magütsüla ta bilemer. Iba tatalokba nungi tenzüker Yisu alima nung nisungtem den ali tepiyong mapang aser mapa ajak nung Pai sarasadembaji asenoki jungjunga tanüla tenük agi reprangdangra, asenokia asen kümtetdakba Yisu ama inyaktettsüsa sarasadem ajanga ain aser tashi aruba lenmangji jangjajangja ngutettsü.Tenyartem mapang nunga kodang tenyartem ajak tesem ka nung adenshir sarasadema liasü, idangjiang kotak nungi mopong tesashi aonba ola ama tanüla temeshi alu aser parnok ajak tanüla temeshi ain aser tashi agi sünger osangtajung sangdongtsü tenzük. Iba anogo aser mapang nungjiang nütsüngtem dak nungi nisungtem tsübuba tetsübu tanüla samaa adok. Sarasademba ya tanga mapa kecha agia melentsü makok, kechiyong mapa ajak rongnung sarasademba ya mapa tongtibangtem rongnung tongtibangtiba ka lir. Asenoki Tsüngrem o azüngtsü akok aser Tsüngrem o jembitsüa akok saka sarasadem mesüra asenoki Tsüngrem o mangatettsü aser temoatsü küma Tsüngrem o mejembitettsü, kechiyong asenoki azünger saka tangatetbabo tanüla temeshii agütsür, asenoki jembir saka tanüla temeshi ain aden nung dang asenoki jembibaji Tsüngrem o akümer. Item tangatetba aser temoatsü ain ajakji sarasadem ajanga dang arur. Kodang asenoki sarasademer asenok tekolok aser shisatsü ajak Tsüngrem den longjemer aser idangjiang Tsüngrem nungi angutsüba shisatsü aser ain tashi ajak agizüktetter. Atangji, Tsüngremibo asenok ya teti tanüla temeshi agi sünga lidaktsüner aser asen jakdang arutsüba tatidang aser lendong timtem koktettsüsa renemtsüner, ajisüaka asenoki ochimulungjang agi sarasadem mesüra kodaser Pai iba tashi aser ainji agütsütsü. Atangji, asenoki sarasademer saka ladakladaka dang sarasademtetter. Asenoki sarasademer saka zübazübaa tanur den jembir ama Tsüngrem den jembir. Asenok sarademji aiben Tsüngrem den jembir ama masü saka yimya ka küpdoktsü inyaker amai sarasademer. Ibayongji, asenoki sarasademaka tanüla temeshi asenok dangi marur. Aji oda, asenoksasa asenoki sarasademba nung jangramatemer. Asenok rongnung kar danga yamaji pei sarasadem nung pei jangramatem lira, asenok Tsüngrem anasa mali ta metetang. Sarasadembaji Tsüngrem anasai aoba lir aser Tsüngrem anasai otettsü atema tamasa asenok shi jangraba, taginüba aser ochimashiba tashimait kecha miimbanga meyui nangzüktsüla. Aji oda, asenok dak tashimait aika liaka asen mulungjangji ochishia linüba mulungjang aser Tsüngremi mulungba inyaknüba temulungjang temerük asütsüla. Aji süra, tanüngbajibo asenok sarasadem ajanga Tsüngremi asenoki mangmangtsüsa asenok dak inyaktsü. Atangji, asenok rongnung kar danga sarasademner saka sarasadem mesütetter ta lira, kecha terata, saka  Mathi 6 nung agüja aliba, Yisui sayuba sarasadem angazükang aser nü temulungjang aser tanüla ajak Tsüngrem nem bendanga agüja sarasademang. Idangji, tanüla temeshi alua nü taküm nung mapa inyaktsü. Atangji, Mark 14:36 nung shia aliba ama, Yisui sarasadema meshiba amabo Tsüngremi tetibo magütsü, saka teti Tsüngremi sarasademji Pa mulungba nung langzü. Aji oda, Tsüngremi mulungbaji asenok asoshi teti tajung aser tajangzük lir. Yisui sarasademer aneptsü, sarasademer tasü nungi shia arudaktsü, sarasademba agi yipru mopong anendaktsü aser sarasademer chiyongtsü tera agi aika küma chiyongdaktsü. Item  ain aser tashiji odang aruba masü saka aonung piyong sarasademba agi, anepdang yakta saaker sarasademba agi aser temulung ajak agi amanga aser lumia sarasademba agi inyaktet. Tanüa asenoki Yisu Khristai sarasadema sayuba   amaji shi nung dena timtem agia asenoki bendanga agüja sarasademtetra, Yisu aser Pa nütsüngtemi inyaktetba kasa sayatenya mapatemji asenokia inyaktettsü.