Sarasademba ya terenemshiba mapa

Asenoki aiben sarasademba ajanga Tsüngremi asen tia melentsütsü dang bilema sarasademer. Ajisüaka, Tsüngrem dang sarasademba ya asen ajungtsü dang bilema asen tia tajungba asütsü atema sarasademer masü saka asen taküm, kibong aser asen lima nung Tsüngremer sentong atalokdaktsütsü asoshi renemshiba mapa ka lir ta asenoki angatettsü junger. Ibaji kodang angateta sarasademdir, asen sarasadem ajanga asen nükjidong masü saka Tsüngremer nükjidong ataloktsü. Iba amaji kodang asenoki ochimulung agi amanga sarasademdir, Tsüngremi asenok ajanga Pa tashi amshia mapa inyaktsü. Tenyartem mapang tenemnü benjong mapang atalokbatem asenoki bilemdangra, nütsüngtem külemi sentepa alidang aoksaa kotak nungi mopong tesashi aonba ola ama Tsüngrem ain arubaji parnoki sarasademba agi masü saka parnoki sarasadema Tsüngrem sentong atalokdak shilem agitsü asoshi arua ataa aliba agi atalok. Asenoki sarasademba ajanga atalokba o asenoki Tsüngremi ashiba angaa Pa nükjidong ataloktsü asoshi sarasadema atadang atalokba na tetsüngda talanga ittepa lir. Par nütsüngtem dang Yisui Tsüngrem sentong ataloktsü asoshi kechalenia moi Yirusalem nung dang ataa liang ta ashiba Tenyar Mapa 1: 4-5 nung shia angutsü. Iba oji angaa nütsüngtem Yirusalem nung sarasadema ataa alidang Tsüngremi Pa nükjidong ataloktsü asoshi parnok amshitsü tenzük. Aji oda, kodang parnok sarasadem ajanga Tsüngremi parnok amshi tenzük, memetetika parnok temulung ka dang küma longjemadok aser parnok maparen ajak nung telemtetba agitsü asoshi Laishiba nung kechi shia lir ta angatettsü meranga Tsüngrem o bushitsü tenzük. Asen taküm ajanga Tsüngremer sentong atalokbaji yamaji ataloker. Ajisüaka, kodang asenoki Tsüngrem dang aseni mulungba ama aser aseni aginüba ama sentongtem atalokjang ta sarasademdir, idangjibo kecha mataloktsü aser Tsüngremiang asen sarasadem melangzür ama asenoki bilemtsü. Asenoki sarasademer saka melangzür aser meshir saka magütsür ta asübaji asenoki Tsüngrem mulungba nung masü saka asen mulungba nung amshitsü meshiba agi mataloker aser magütsür ta Yakob 4:3 nung shia angur. Iba amaji sarasademba ya Tsüngrem nem asen mulungba inyakdaktsütsü asoshi mepishir masü saka Tsüngremi mulungba asen taküm ajanga atalokdakjang ta mepishiba sarasadem asütsüla. Aji oda, Tsüngrem nükjidong ataloktsü asoshi asenok lumia sarasademtsü nüngdakra lumia sarasademtsüla aser asen taküm ajanga Tsüngremi kechi inyaknür ta asübaji angatettsü merangtsüla. Asenokibo asen sarasademba ajanga yakta dang langka atalokba ngunüa yongyatsü akok saka Tsüngremibo asen tangatetba aser tamang jenjangji dang repranger. Laishibai ashir, Tsüngrem meimertem asoshibo tatalokba kechisarina ajak tajung asoshi dang ataloker (Rom 8:28). Aji oda, asenoki Tsüngrem meimra aser Pa dak amanga sarasademra, aseni mulungba ama masü saka Pai mulungba nung asen taküm aser kibong tia melenshitsütsü. Iba tangatetba nung asenoki sarasademba ajanga Tsüngrem ain agizüka amshir ta mebilemtsüla saka sarasadem ajanga asen taküm ajanga Tsüngremi Pa ain amshia mapa inyaker ta asenoki angatettsü junger. Asenok sarasadem nung “Nü mulung sang” ta shia atemba ya tapi masü saka asen mulungba nung masü saka Tsüngrem mulungba nung inyakang ta asenoki Tsüngrem tsüngdang ajemalua ashir. Karibo sarasadem nung Tsüngrem dang “Nü mulung sang” ta meshiner. Tetezü, Tsüngrem nem ozüng dang agütsüner aser ibaji ataloktsü imlar. Iba jagi Tsüngrem jashir asü mesüra menünüa dang bilemar ashitsü makok, saka alima nung akaba ajak ya Tsüngrem meyong, anungji asen taküm aser lokti madaka asen mulungba agi masü saka Tsüngremi mulungba nung ketdang asütsüla. Tatsüba agi, sarasadem ya Tsüngremer sentong atalokdaktsütsü asoshi renemshiba maparen ka ta angatetra, aseni aginüba apia masü saka Tsüngremi mulungba atalokjang ta asenoki sarasademtettsü aser aseni meteta, ngua aser kongshia sayatenya mapa aika asen ajanga atalokdaktsütsü.