Sarasademer Govt. tenzüker !

Dr.Shürhozelie Nagaland nung 17 buba chief minister inyaktsü asoshi tenangzükba agiba sülen Nagaland Civil Secretariat, Kohima nung pa mezüng chief minister mapa inyak tenzükba anogo Brehostibar nü mezüng cabinet senden sarasadem mapang agir tenzükbaji Nagaland state otsü nung mezüng asütsüa akok. Atangji, Shurhozelie-i anir Nagaland nung yimsüsür par roker pronglaji Khristan purtem lir, anungji Khristan kati Tsüngrem nem tenüngsang agüja aser taochi meshia sarasademer pei mapa tenzüktsübaji kecha balaka masü. Ajisüaka, Nagaland nung yimsüsürtem senden sarasadem mapang agir tenzükbajibo balaka, kechiyong Naga nunger yimsüsürtemi yimten mapa tenzüka aotsü asoshi sarasadem mapang ayongzükbabo kodanga mangashidang aser kodanga agia maru südi. Pi tsümarbo kidang dang masü saka pei office nung pei tsüngrem noksa yur, anogo shia pei mapa tenzüka maodang iba noksa jakdangji nokdaker teronem menemba liangmesen ronga sarasadem mapang tama agir. Aji oda, tsümartembo election nung takok nguli tamasa pei tekülemba tenla kidangi orr tama sarasademer külen dang tanüngba sentong tenzüker. Ajisüaka, Nagaland nung asenok Khristan-tem jakla aser inyakyim reprangdangra government sentong kecha sarasademer metenzüker, kechiyong yimten sentong ka sarasademer tenzüktsübaji asenoki mazümazür amai bilemer. Aji oda, Hornbill benjong sentong ama nunga Reverend ka nem sarasademer tenzükdaktsütsü melen akhi limapur külemküja yimya dang menungraa asenoki Tsüngrem amadoker benjongteper. Atangji, Shürhozelie-ji ochishir aser temeshi nisung ta masü saka paa tangar külem yimsüsürtem amaji ochimashi aser tashimait aika alitsü. Ajisüaka, tajung kaji paibo sarasademtsü bilemtet. Aji oda, ajak temenen pur aser ochimashi agi sünga lir, saka kasa ochimashi temenen purtemsa süaka sarasademer inyakba o kenyongi sarasadem masüba taküm aser mapa naji tetsüngda talangka aittsü. Tangbo Nagaland Civil Secretariat, kong chief minister aser Chief secretary nati anir Nagaland nung yimsüsür aser tongti ketdangsertem ajak amener, iba kidang inyakertemi tenük amur sarasademtsü melen tenük amur auyar. Aji oda, civil secretariat nung amener ozüng latettertem aser Nagaland asoshi sentong yanglurtem shisabolubaji Nagaland tajungba küma renloka aotsü shisabolur masü saka Delhi nungi aruba sen nübortem dang miima agizüka agitsü aser itemji kodaser Delhi nem meputetdaktsütsü ta bilemdangdang tantsür tambur kümer mapa nungi anentsü mapang atonger. Iba jagi government melen shia state sentsü teimba-teimba akümer aser Nagaland-bo tamajungba tamajungba akümer. Atangji, Nagaland nunga mapa inyakertem karbo anogo shia pei office nung sarasademer dang mapa tenzüka alitsü. Ajisüka, yimsüsür aser ketdangser tulurtemi sarasademtsübaji tim masü amai bilemer, kechiyong sarasademer auyatsü aser sarasademer ochimashi mapa inyaktsübaji ano talila atakatem bendener amai bilemer. Aji oda, nisung temulungjangsa tekülakba ta Laishiba nung shia aliba amato, ochimashi mapa inyaktsü aser auyatsü bilema, item tim masüba mapatemji sademsadema inyaktsü asoshi yimsüsür aser ketdangser tulurtemi sarasadem masür. Tsüngremi iba mulngjangji ngua lir aser pai item nisungtemi bilemba ngua kanga menütsür ta T.Ken 37 : 13 nung shia agitsü. Lendongji ibaji lir. Aji oda, tanü ochimashi mapa inyaktsü nükjidong nung yimsüsür aser tulurtemi Tsüngrema mali ama sarasadema mesüi nübortem meyong nübortem dang miima bendenba rongsen agi takar akümbaji süngdong tulu dera dena mali küma samaa aoba ama kongadoktsü aser samatsü ta T.Ken 37 nungsa shia angutsü. Tanü Tsüngrem dang taidok nangzüka sarasademtsü melen auyatsü bilema sarasadem masüba taküm aser kibongtemji nübortemi kecha mesütetyonga Tsüngremi lepdoktsü. Iba ama lendongbang nung aliba tensa tia meteta, yimsüsür aser tulurtemi Tsüngrem dak dang amanga tajung inyaktsüla, ochishia alitsü merangtsüla aser tajung inyaktsü shisatsü aser tashi meshia sarasadempet sarasademtsüla.