Sarasademer saka mamanger!

Asenok atema nüngdak ka Chief ministerba ket nung lir saka pai magütsütsü ta metetsümonga pa dangi orr asüngdangtsü asü ? Mesüra Chief ministerbai asen ki tonga arur asenok nüngdak kechisa pa dang meshidir agütsütsü ta nangzüker oaka, pai magütsütsü südi ta bilema oa meshir asü ? Yamaji ka mesüka asenoki aiben Tsüngrem dang asüngdanger. Atangji, asenoki Tsüngrem dak amanger saka Pai asenoki asüngdangba magütsütsü ta bilemer. Asenoki sarasademer saka asenoki sarasadembaji mataloktsü ta bilemer. Asenoki Tsüngrem dang asenok nüngdak meshia sarasademer aser kodang ibaji ataloker asenoki mamanger. Ibaji Tsüngrem tsüngdang kanga tezüdangtsüka lir.  Ajisüaka, Tsüngremji temeim lir(1 John 4:8). Iba temeim aser taochi jagi asenoki mamangjaika sarasademyonga asenok nüngdak meteta Pai agütsür. Asenoki Tsüngremi asen sarasademba langzütsü ta kenyongi meimlaika sarasademer saka Temeim Tsüngremi asenok mamangba purtemi sarasademba langzür. Iba taochi aser taremzükji tesüngmangtsüka lir. Asenoki tebang agi Tsüngrem dang sarasademer saka temulungibo mamanger. Tsüngrem tsüngdang ibaji koda tesempatsüka. Aseni asübo kanga artsütsütsü aser merenshitsü langa lir. Ajisüaka, Tsüngremi asenok aochibayong anogo shia asenoki Pa dak mamangaka Pai asen nüngdak peritsür. Asenoki dang asüngdangra, asenoki tamakoktsü ama bilema aliba tebilemtsütem to Tsüngremi melamelaa inyaktsür. Ken mapang ka tenyar Peter tepuokdak puoka liasü. (Tenyar Mapa 12). Idangji  tenyar Yohan tedi Yakob-bo Herod chubai nok agi lepsetdaktsür liasü. Aji oda, Peter chiokdaktsütsüsa nisung shinga dak tashi mali asü. Memenui Yakob ama paa lepseta endoktsü mapang ka tonga arur amai liasü. Iba mapang nung Yirusalem nung Tsüngrem dak amangertemi ki ka nung longjemer sarasadem. Parnoka dena sepaitemi arua pua bener aotsü  tsübuba agi ki telong nung shibanga yur sarasadem. Parnok sarasadem tesüdak nung Tsüngremi indangjisa parnok sarasademba langzü aser kotak tenyar ka yoka Peter tepuokdak nungi anitet. Peter tepuokdak nungi chiokang ta tamangertem kar Yohan shiba dang Mark ta aja, pa tetsü Mari-er kidangi sarasadem tesüdak nung Peter tepuokdak nungi arur par kishi nungji akoshitsü. Parnoki chiokang ta Tsüngrem dang sarasademba Peter to parnok sarasademba ki kishi züng nung asangsang nokdaka liasü, saka parnoki paji Peter a ta mamang, kechiyong parnoki sarasademaka Peter to tepuokdak nungi chioktsü ta mamang. Asenoki tebang agi sarasademba o temulung agi amangba na tetsüngdaji ibaji lir. Parnoki sarasadem nungji Tsüngremi Peter-bo chiokdaktsü saka Peter chiokang ta sarasademertemi Peter arua parnok kishizüng nung akoshia nokdaksangji tanüla a ta bilem. Peter arua kishizüng nung nokdaka angulajiang yiamatar ta bilem. Asenoki sarasademer saka Tsüngrem dakbo mangmanger ta asüba temulungjangji Tsüngrem tsüngdang taaktsüka lir. Asenoki sarasademba Tsüngremi langzüba asenoki ngur mamangbaji aser süngmanga bilembaji asenok kechi atema sarasademer asenoki ibaji agizüktsü asenok temulungjang merenemba ajanga lir. Asenoki Tsüngrem dang asendenshi tulu yokang ta sarasademer saka asendenshi arutsüba lenmang asenoki merenemer, asenoki Tsüngrem dang taidokang ta sarasademer saka asenok mulungjangbo taitsüba agi sünga lir, asenoki asenok nüngdak meshia sarasademer saka asen mulungjang nung shisabolubo manener. Item jagi asenok kangshir. Tsüngrem dak noklang shilem nung noklang mulung alemtsüsa asenok tamang ulushitsü kanga nüngdaker. Tsüngrem taochi agi, asenoki Pa dak junga mamangaka, Pai asen sarasadembo teti langzür, saka asenoki Pa dak dang amanga melitetba jagi asenok pelaa alitsü melen, shisabolua dang alir. Tsüngrem dang asenok tamang ulushijang ta asüngdanga tanübo ano ken sarasademdi.