Sarasademi mapa tulu inyaker: Chance the Rapper

California, Aami/June 03 (Agencies): Nüngtugu hip-hop ken atener Chance the Rapper-i ashiba agi, pa tetsütanutsü tezüngjang (kidney) nüngdaker ta metetba sülen Tsüngrem dak amanger.
Ultralight Beam ken atensangi iba osang ya Twitter nung May 23 nü sangdong aser pa indang follower million 8.2 dang teyari meshi.
“Ni teyari kanga nüngdaker. Kütsütanutsü Toni yak ü taküm nung kangatang tongtibang nisung ka lir aser la tezüngjang ka kanga nüngdaker. Onoki lenmang ajunga nungi merangogo aser küm aika atasaa arur. Ozü kinungertemi sarasadem tashi nung amanger aser onoki iba tebilemtsü Tsüngrem nem nungloktsür,” ta Chance the Rapper-i May 23 nü Twitter nung zülutsü.
Par kinunger temang lendong nung liaka la taneptsü angutsü tamang akar, ta Chance-i ashi.
“Ozü kinungeri sarasadem tashi nung amanger aser onoki iba khuret Tsüngrem nem nungtsür. Sarasademi mapa tulu inyaker,” ta pai zülutsü.
Pa kangadang meima aliba tetsütanutsü asoshi iba tezüngjang bushiba nung tetenlar angutsü teimla nung la indang blood group metetdaktsü.
“Iba züluba mapang kü mulung nung kongshir. La O positive lir. Nai nü azü aser temang tendanga teputep bushitettsü,” ta paisa zülutsü.
Nisung aikati Chance-i züluba langzü. “Hi Chance. Imlibilema küdangi message yokang. Anogo ishika tejakdang ni altruistic living donor ka akümtsü tenangzüktep agiogo. Ni iba tenangzüktep agiba ya ner atema amai lir. Ni inyaktettsüsa lira imlibilema kü nem metetdakjang,” ta nisung kati zülutsü.
Ano nisung kati, Hey@chancetherapper kü indang azü ya O- lir aser ni nisung mashi nem tezüngjang agütsütettsü. Imlibilema pa nem iba ya ngudakjang!” ta zülu.
Iba sülen tatemsa Chance-i, “Tenangzükba agütsüba Tsüngrem ka ni tenzüker aser Pa indang mapang nung aibelen masür,” ta zülutsü.
Taoba mapanga Chance-i pa indang tamang tsütsü kangasa jembia aru. December ita nunga rap ken atensangi pa Laishiba bushitsü asoshi maparen balala nungi anisüngzük agir, ta shia liasü.
“Khrista metettsüsa ozü kibongi ni anitet saka kü indang Laishiba azüngtsü anogo kata magizükteti lia aru,” ta pai iba mapang Instagram nung zülutsü.
“Asenok ajaki Laishiba tekongtem züngshir aser kati ka dang Tsüngre ya komar asenoki ashir saka asenoki Yisu sülen anidaker kaka ama Pa O metettsü aser azüngtsü mapang magütsür. Pa nem mapang bendanga magütsüba asoshi sasar,” ta Chance-isa ashi.