Sarbananda Sonowal-i Bodousa Samanway Award agizük

Amungnü Tensukia nung Chief Minister Sarbananda Sonowal-i Bodousa Samanway Award agizükba yangi noksa nung angur.

Guwahati, Monupii (May) 7 (Agencies): Amungnü (Deobar) Tinsukia nung Assam Chief Minister Sarbananda Sonowal-i Bodousa Samanway Award agizükogo.
Iba sempet ya All Moran Students Union ajanga agütsür. Sempet agizükba mapang o jembidang Chief Minister Sonowal-i lanurtem dang Bodousa aser Chaulung Sukafa lennirtem tsüngsü sülen anidaktsü ayongzük.
State aser linük renlokdaktsütsü atema tena ama mapa inyaktsüla, ta paisa shisem. Bodousa and Chaulung Sukafa-i terenlok atema benokba onüktem atema teyari agütsütsü aser Assam nung tanga kaketshir teloktemi iba ama mapa inyaktsü ayongzüker, ta Sonowal-isa metetdaktsü.
Assam state nung aliba kin aser telok ajak putepa aliba tamaitsü sayutsü atema state sorkari Dr. Bhupen Hazarika tenüng nung unity complex ka yanglutsü aser iba ajanga North east state tem indang sobaliba takar sayutsü, ta paisa ashi.
Lanurtemi science & technology wadang nung maongka alibatem agitsüla. Tanü-asüng indang technology amshia mapa inyakra aser bendanga agütsüra, pei taküm nung takok tulu angutsü, ta Sonowal-isa kaketshirtem ayongzük.
State sorkari ochimashi anema tanen makai raratsü aser nübortemia sorkar inyaksangshi nung tenük yoka mittsü ayongzüker, ta Sonowal-isa shisem.