SARFAESI Act memelaba ajanga ozüng alema sen aputsüba maparen ajungmesor

Dimapur, Tsüklai/Feb. 20 (TYO): SARAFAESI ACT application magizükba ajanga Bank aser financial institutions tem nungi jenjang talangba nung sen apuba anendaktsütsü aser nija sen aputsür nem loan market awabangtsüdaktsütsü melatsü, ta NPCC tir, K. Therie-i sangdong ka ajanga metetdaktsü.
Parnok tebilembaji nüngdakbapur indang kiojen aser business tem agitsübaya lir. Nija sen aputsürtem ya timba ochimashi mapa tululu inyakba yimten timsüsür meyong lir. Bank aser financial institutions nung sen temlokba jenjang ya küm nung shilem 8.50 nungi 12.50 tashi lir, aser nijai shilem 60-120 meshir, koba shilem 500-1000 agi timba lir, ta pai ashi.
Temelaba maka aser ozüng alema senotsü aputsür ajungmesotsü mechi sorkari tasü ama mapa küma meinyaki aliba Nagaland Money Lenders Act of 2005 ya tanemi ayu. Act nung aliba ama ozüng shidak amshiba mita reprangtsü asoshia Inspector tem meshim. Ozüng alema aser temelaba melie sen aputsürtem nem sadem sadema kiojen agidaktsür, kechiaser senotsü apurtemi tetemlok jenjang tali aliba memenokteter. Tasüngtet business katia tajangzük shilem 500-1000 yangluteta melitettsü, ta NPCC tiri ashi.
Bank aser tanga Financial Institutions tem nungi teyari magitetba ajanga economy ainba nung kanga sashia kongshiogo aser Kohima aser Dimapur nung aliba kiojen kibur jenti tesem balala nung jenok. Taoba mapang kaa-ita alirtem tangbo talitsü ki maka kümogo. Business aika tamakok ajuruogo.
Ali kimong jenjang mesangdongtetba ya tenokdangtsü ka lir. Sorkari nübur economy ainba nung yaritsü sentong mali. Subsidy atema industrial policy tataktet ka dang lir, kechiaser sorkari capital aser working capital nem senotsü teyari agütsütsü sentong mali. Maneni sorkari kaketshirtem senotsü nung yaritsü sentong kecha mali, aser parnoki tanurtem indang scholarship tema mashi lenmang nung amshir.
Nagaland Money Lender Act of 2005 mapa küma aoba sülenbo License maka sen aputsürtem ya ozüng alema lir, kechiaser küm ka nung sen temlokba ya Bank indang average interest rate dang nungi shilem 3 dang tali masütsüla aser küm sasep nung bendentsüla.
Sentsüh yong ali-kimong agitettsü saka yimjak nung auction asütsüla aser Nagaland Land and Revenue Regulation Act of 1978 aser amendment of 2002 kübok lisopuri agitettsü.
Money Lenders Act nung agüja aliba jenjang dang nungi tali sen apurtemi magütsütsüla. Judicial paper mesüra tanga paper nung tezüngzüktep liakasa yimya mashi nung Nagaland Money Lenders Act nung aibelenra ibaji ozüng alema lir, ta Therie-isa metetdaktsü.
Aser iba maparen atema 2nd class Magistrate dang temaba court nung oa sen apurtemi pei temeden bushitsütsüla aser ozüng alema sen aputsür dang nungi anisüngzük agitsüla. Nisung kari danga nüngdaka lira Congress legal cell-i angadi service agütsütsü, ta NPCC tirisa ashi.