Saring Rongpang lenmang nüngo long semzük

Dimapur, Nov.13 (TYO) : Akhidang Aortem Ahom leni aluba Saring Rongpang lenmang lapokba bilemteta Marok Dibuia yimtak tan November 8, 2016 nü to nüngshilong ka azünga Khensa putu menden nung mendenbuba Wb.Y.Chuba Longchari lapoktsüogo.
Iba sentong nung Khensa, Chungtia, Aliba, Khar, Marok Dibuia, Changdang aser Aonokpu yimtem nungi putu menden nung mendenbubatem dena liasü.
Saring Rongpang lenmang ya akhidang Ahom chuba Sukhrangpha yimsüsüba mapang lapok aser iba lenmang yagi Ao lima o Ahom lima na sendaktepdaktsü ta Dibuia yimteni sangdongba osang ka nung metetdaktsü.
Iba nüngshilong semzükba sentong nung jembidang, ” iba lenmang nung tanübo asenok mejajar asütsüa akok saka iba lenmang otsü ya Naga nunger aser Assam nunger na prongla atema tongtibang asünungji, mesamadaktsüi wazüka ayutsüla aser Aor o Assam nunger tsüngda maneni tesendaktep tajungba küma alitsüla ta Wb.Y.Chuba Longchari metetdaktsü.
Iba sentong nung menden Marok Dibuia nung GB Wb.P.Mar Walling liasü aser Dibuia Compound Baptist Arogo nung sannüker Wb.R.Moai sarasadema sentong tenzük.