Sarma aser Rio na arrtsü onüktem jembi

Guwahati, July 2, 2021 (Agencies): Hokolbarnü New Delhi nung Assam Chief Minister Himanta Biswa Sarma-i Nagaland Chief Minister Neiphiu Rio den ajurutep. Iba mapang tenati arrtsü dak sendakba onüktem lemsatep, ta Assam Chief Minister Sarma-i tanü nikongdang metetdaktsü.

“Tanü New Delhi nung Nagaland CM Neiphiu Rio den ajurutep. Künati sorkar anaprong külemi yaritepa arrtsü dak sendakba onüktem angatetteptsü atema tebilembatem lemsatep” ta CM Sarma-isa ashi.

Taoba mapang Assam CM Himanta Biswa Sarma-i osangbener den jembidang Assam sorkari Northeast state tem den arrtsü mangatettep onüktem angatetteptsü ta shia liasü.

“Northeast state tem tsüngda arrtsü mangatettep onüktem ajanga tetsükdaktsü bentsür arur. Northeast state tem tsüngda arrtsü onüktem angatetteptsü atema Assam sorkari tongti süa inyaktsü” ta Sarma-isa ashi.

“Asenok den kidanger state tem den arrtsü onüktem angatettepba ajanga tourism, infrastructure development aser connectivity amala policy tem nung tajangzük alitsü aser Northeast renloktsü” ta Sarma-isa ashi.

Brihostibarnü United Naga Tribes Association on Border Areas (UNTABA)-i Nagaland sorkar dang Assam den chief minister jenjang nung olemtep alitsü aser interim agreement ajak meyipa reprangshitsü ayongzükogo.

“Assam sorkari Nagaland lushii tashiyim agi aiter aser armed police o forest personnel atema camp tem amenoker. Tang Tsurangkong tzükong kübok Vikuto yim nung tensa ajurua aliba ya Assam sorkari asaa ali atsünga agitsü merangba lir. Parnoki mangatettep aliba tesemtem nung ozüng alema aruba nisungtem lidaktsütsü meranger” ta UNTABA-i ashi.

“Iba ya Assam sorkari tesüiba mapang nungi inyakba aruba mapa ka dang lir. Parnoki arrtsülen Naga nunger ali atsünga agir” ta UNTABA-isa ashi.