Saru agütsüba timtem

Yashi Nagaland nung adokba osangkakettem ajak nung National Investigation Agency (NIA) purtemi Nagaland government nung ketdangser asem apuba osang liasü. Par asem jagi NSCN-K purtem nem government sen agütsüba puteta parnokji apu ta angazükogo. Ibaji shitak alitsüa akok saka Nagaland nung Naga nunger linük tenzükertem nem Nagaland government nung inyakertemi saru agütsübaji osang tasen ka masü aser mimshia inyakba mapa kata masü. Nagaland nung government tenzükertemi ajuruba timtem tulutibaji Naga nunger linük tenzüker telok pongo trok ka nem küm shia mesüra mapa shia saru sarua agütsütsübaji lir. Aji oda, khuret tulu asünungji taküm nungibo NSCN-IM telokibo goverment tenzükertem dang nungi saru kanga ajemer agitsü osang sangdongba taoba hopta nungang asenoki nguogo. Iba ama saru sarua agütsüba mapa nung department shia mesüra office shia nung tekolaktemang kanga shisabolua alitsü. Aji oda, yashi NIA teloki apur ketdangsertemji tia majung pushi dang ashi, linük tenzükertem nem sarubo government ketdangser aser mapa inyaker ajaki agütsüdagi. Aji oda, ita sen nung dang masü saka government-i inyakba mapa ajak nung shilem tilakabo linük tenzükertem nem agütsür, iba jagi Nagaland nung mapa junga inyaknüaka meinyaktetter. Tanü Nagaland mainba aser merenloktetbaji yimsüsür aser ketdangsertemi ochimashi inyakba kija agibo masü saka saru sarur telok aika aliba ajanga timtem takoksa jenti ngudagi. Atangji, linük tenzükertem nem saru sarutsüba nunga ketdangsertemi ochimashi mapa inyaka alitsüa akok. Iba timtem ya manendaktsütet tashibo Nagaland renloknüaka merenloktettsü. Aji oda, Delhi nungi aruba sen ajunga agi state government tenzükertem o linük tenzükertem na nüngdakang meperir asünungji, Nagaland atema terenlok mapa inyaktsübo sen manünger. Iba ama tensa tia ka nung Naga nunger longjemtsü kanga nüngdak kümogo. Joko, küm aikabo yamai linük tenzükertem nem saru agüja Nagaland government tenzükertemia meinyaktettsü aser nübortemia maremtsü. Idangjibo, pi bendanger tsüngdang taaktsüka Naga nunger linük tenzükertem o Naga nunger nübortem na tsüngda rarateptsü. Iba ama tensa tia tamajungba kati asenok memenepdang asenok longjemtsüla aser yimten tebilemtsü ya koktettsüla. Tanü Naga nunger lanurtem asoshi tia majung kaji, Naga nunger yimten nüjiso asoshi raraba ajanga Naga nunger nüji aküm masü saka Naga nunger yiar amai kümer katep aser telok ka nungi ana, ana nungi pezü ta telokang teimba-teimba küma lemsatetogo. Tanübo joko Naga nunger asoshi nüjiso angutsüba tebilemtsü masü saka Naga nunger yimten nüjiso bushirtem telok paika ya lemsar aliba ya ka küma longjemtsüang tebilemtsü tuluba kümogo. Aji oda, Naga nunger tema aser telong nung alir ajak yimten nüjiso bushir masü saka alima rongsen bushirtem dang küma omaogo. Naga nunger tarutsü putu asoshi jepaka nüktsü malu bilemba tebilemtsüji aji lir. Tanü linük tenzükertemi saru sarubajia linük tenzükba mapa nung shitak amshir asü koma ? Ano, government tenzükertemia linük saru tera agütsür tanüngba jagi nübortem asoshi mapa shitak inyaker asü masü ? Atangji, linük tenzükba mapaji nübortemi saru magütsüiang metenzüktettsü, anungji tetenzükdangyongi nübortem saru agidang Naga yimten nüchiso asoshi raraa aru. Aji oda, yimten nüchiso atema raraba tongpang nung tebok aser teka tazüng menokdaktettsü. Item ajakji nübortemi angateta yariteptsübaji tim. Ajisüaka, tanü linük tenzükertem shitakba linük tenzükba mapa nung nokdaka ali asü (?) ta reprangdangtsübaji kanga nüngdak kümogo. Alima yimten asoshi inyakertemi metettsüba kaji, yimten tenüng nung nübortem dang tashiyim agi saru sarua raraba tongpangji makoktsü aser nübortem dang tashiyim agi saru sarua akaba rongsenji kodanga senmang küma maotsü. Alima yimten tongpang akoktsüba nok nü tajungtibaji tangatetba, anungji sarua tangatetba agi sarutsüla aser tagütsürtemia tangatetba agi agütsütsüla. Iba ama tangatettep nung inyakba ajanga dang asenok nüji akümtsü aser asenok nüji kümra, ibaji asenok asoshi nüjiso asütsü.