Sarua joko tangari sarur !

Taoba hopta ka piyong Dimapur nung Naga Council Dimapur (NCD) tenüng nung Public Action Committee (PAC) ajanga Naga kin shia nungi mitkartem shima Nagaland gate nung ozüngi memelaba saru saruba mapatem nokdangba ajanga nübortemia pei mapa meteta inyaktsü tangatetba tajung ka agütsüogo. Asenok ama, kin kidong mesüra kibong kati masü, nübortemi yimten yimli lateta yimsüsüba democratic lima ka nungbo nübortem dak pei lima ajungtsü majungtsübaji tash tuluka keta lir. Nübortemiang government akümer aser government nung inyakertem ajakji nübortem tenzüker lir, anungji government tenzükertem ajaki pei mapa meteta nendaka inyaktsübaji nübortemi pei lima aser yimten madak kibur küma khuret aben nung dang tenzükertemia mapa shitak inyaktsü. Aji oda, tang PAC purtemi nükenbelem arema Nagaland gate anükbaji tanükeri junga manükba agi mepelaba sayua kiburi oa anükba mapa ka asütsü. Nagaland nung alo beas nungi shir yinjung tashi nung jenjang atubaji Nagaland gate nungi tenzüka godown aser dokan ajak nung saru agütsür magütsüma saruba ajanga ataloker. Tamalen yangi lemsatepba ama, kechisüdir süaka tayokertemibo pei akoksatsüsabo mayoktsü, iba jagi saru paikaya liaka tayokertemibo aremer saka talir, tagir aser tachitajemertemi maremer. Ano, tejashitsüka aser taaktsüka, tebilemdangtsü mapa kaji, Nagaland nungbo Naga nungertem teimbaka mapa meinyaki chiyonga lir. Alu mayimer aser teka mapa kecha meinyaker saka jangratema alir ta asüba Naga nunger aika lir. Item  jagi pei melen mapa ajak tangar nem inyakdaktsür. Asenokbo temeyonga meküraktsü aser mena yur dang tangar nem asen nüngdak ajak bener arudaktsütsü ta asüba azümesen telokji asenok lir. Joko, aluyimba aser teka mapatemji toktsür, Naga nunger linük tenzükertem telok balalai saruba linük sarua dena tsümartem nem sarudaktsür. Atangji, dokan amenba aser shishilembaba maparen ajak nung tsümartem dang lir, anungji tsümartemiang parnok tajungba meteta lir. Tanabuba nung tsümartem nem sarudaktsüba agi asenok lendong aika nungi jenbur. Ajisüaka, tsümar chanu ka nem Naga nunger linük saru sarudaktsüba jagi asenok dang nungibo tsümarsangjiang tashi tuluba kümadoker. Ibayongji, tanü Dimapur ama nungbo, tsümartemi Naga nunger lisopurtem kecha hau ta mali mezüngmeshia o tululu jembitetter. Ashiko, parnokiang parnokji Naga nunger nüchiso atema senotsü bushitsür amato bilema temulung ulur südi. Asenok asoshi lendongji yang nung jagi tenzüktsü. Tsümartemibo sen mechibo shinga maochitsü, anungji parnok ya asen lima nung rakzükratemertem akümer. Item ajakji yutsür, tsümar chanu kati asenok liso purtem dang Naga saru meshitsüsa asenok aliba jenjang ya kangasa taaktsü aser tamakok jenjang tuluka nung asenok alir ta asenoki angatettsüla. Tang amaji aiben asenoki asenok nüngdak nung tangar amshiba ajanga asenok rongnunga temulung melemtep adoka lendong ajuruba otsü lir aser ano ajurutsü. Tsümartemi Naga nunger linük saru sarutsübaji, ashiko, teimbaka parnok ket nungang yua alitsüa akok. Tanü asen lima nung ozüngi memelaba mapa meinyakdaktsütsü asoshi nübortem (govt)-i ita sen agüja ayuba mitkartemi anir saru mesarutsüla department aser teloktemiang Nagaland gate nungi saru meshi tenzükba maparen yagi Naga nunger kibongtem kanga kangshidagi. Item kibongtemji, jangotsü nung jenjang atuba agi, ita nung sen meyirijang pongo agi peritsüba ser nung sen meyirijang ter agia meperitet timatemer. Joko, mesarutsüla sarutembo asenokia mesarutsüla aser tangar nema mesarudaktsütsüla. Akhidang, Naga nunger linük nüchiso asoshi raradang, Naga nunger kibong saru agi tongpang nung takok ngua nokdak. Aji oda, kibong shiai saru agütsüba jagi kibong ajak linük tenzükba mapa nung shilem agir kaka kümadok. Iba kasa tangatetbaji tanüa asenok ajak dak alitsü tim. Iba tangatetba jagi asenok tongpang nung menokdak tashi, tangar tenyaa sarudaktsüba saru jagibo menokdaktettsü.