SASCI kübok 2nd phase work orders agüjang: NFHRCC

Dimapur, October 30, 2026 (TYO): India kübok state 6- Delhi, Haryana, Rajasthan, Madhya Pradesh, Gujarat aser Maharashtra sendaktepba kilometre 1,386 talang Delhi-Mumbai Expressway 2019 nung ang tenzük saka joko mapa tatemleni arudar saka Nagaland nungbo 2013 küm tenzükba Nagaland Foothills Road mapatong kecha balaka inyakteta mali ta NFHRCC-i metetdaktsüogo.

2024-2025 tsüngda SASCI kübok Rs. 430.77 crore lemzüktsüba nungi 1st Phase ama Rs. 148.5 crore amshiogo aser tanüngba Rs. 282.27 crore ji iba working season nung 2nd phase ama amshitsüla. Ajisüaka, sorkari 2025-2026 mapang SASCI kübok 2nd phase agütsür alitsüba sernung ano magütsü lir anungji Nagaland sorkar dang iba working season tsüngda 2nd phase work orders agütsütsü mepishir ta Media Cell, NFHRCC-i sangdong ka nung ashi.

Peren district kübok Khelma nungi Mon district kübok Tizit tashi kilometer 395.9 talang Nagaland Foothills Road mapatong ya 2013 nung tenzük. Iba mapa nung public-i amalitepa temenok kecha magii ali (40 ft. width) tenla agütsü aser Naga political groups-ia tax kecha magir. Ajisüaka iba mapatong ya küm 14 tashi metembangteti dang lir anungji sorkari tekaraba nung SASCI kübok 2nd phase work orders agütsütsü ayongzüker ta NFHRCC-isa metetdaktsüogo.

Nagaland State ya “Land of Festivals” ama sangdongba ajanga asen state nung terenlok meputepi aliba mekoktettsü. Benjungbentsü amungba nung mashishiteper saka asenoki benjungtem amungdang public indang timtem aser toushi sorkari mamadoktsüla. Sen apua benjung amungba ya shisataka mapa ka masü, rongsen melii benjungtepba ajanga state senpong nung kongshitsü. “Terenlok tetsüji lenmang lir” ta ashir anungji Foothills Road yangluba ajanga rongsen bendentettsü aser iba jagi benjungbentsü amungtsü akok ta NFHRCC-isa metetdaktsüogo.