Sasikala dang Tamil Nadu CM akumtsü asüngdangtsüa akok

Chennai, February 04 (Agencies): Tamil Nadu nung temelenshi ka adoktsüa akok, kechiyong sorkar tashi nung aliba party, AIADMK nungi MLA kari taoba Chief Minister, Jayalalithaa-i kanga melung lemteta alila, Sasikala dang state Chief minister akumtsü atema asüngdangtsüa akok.
Deobarnü nikongdang Chennai nung senden ka amentsü, aser iba mapang nung iba onük süoktsüa akok, ta party osang ka ajanga metetdaktsü.
Tang state nung Chief Minister teinyakdakji, O Panneerselvam lir, saka Lok Sabha Deputy Speaker, M Thambidurai densema MLA kari Sasikala Chief Minister kümdaktsüner.
Yaküm December 5 nü Jayalalithaa asüba sülen party General Secretary atema Sasikala shima liasü.
Yashi Sasikala-i party nung menden tongti kar atema taoba minister tem aser taoba Mayor ka shima liasü.
Taoba Minister tem- K A Sengottaiyan, S Gokula Indira aser B V Ramana nunger den taoba Mayor, Saidai S Duraisamy nunger AIADMK nung Secretary tem shim.
December 29 nü AIADMK nung tongti telemtetba agiba telok, General Council-i Sasikala General Secretary shima liasü. Lai iba menden December 31 nü agizük.
Yaküm December nung state AIADMK General Secretary den minister pezüi Sasikala dang Chief Minister akumtsü asüngdanga liasü.
Iba dak sentakba nung December 17 nü Tirunelveli Urban Jaya Peravai (Forum) senden nung bangzüng ka agizük. Senden nung AIADMK secretary, Revenue Minister, R B Udhayakumar, V M Rajalakshmi, Sevoor Ramachandran aser Kadambur Raju nungera dena liasü.
Arishi küm 62, Sasikala ya küm 30 tashi Jayalalithaa den kanga atongsema inyaka liasü.